2 წუთი კითხვის
სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ სომხეთი რუსეთთან ახალი ატომური ელექტროსადგურის მშენებლობის საკითხს განიხილავს. მან ხაზგასმით აღნიშნა, რომ ერევანი, ყველაზე ხელსაყრელი ვარიანტის მოსაძიებლად, პარალელურად სხვა პარტნიორებთანაც აწარმოებს მოლაპარაკებებს. „არმენპრესის“ ცნობით, რუსეთის პრეზიდენტ ვლადიმერ პუტინთან შეხვედრისას ფაშინიანმა აღნიშნა, რომ ენერგეტიკის სფეროში სომხურ-რუსული თანამშრომლობა კვლავ ერთ-ერთ მნიშვნელოვან და ტრადიციულ მიმართულებად რჩება.
„ჩვენ ვთანამშრომლობთ ენერგეტიკის სფეროში და აქ გვაქვს ძალიან ტრადიციული, მტკიცე კავშირები და თანამშრომლობა“, - განაცხადა პრემიერ-მინისტრმა.
მისი თქმით, ამჟამად აქტიური მუშაობა მიმდინარეობს ახალი ტექნოლოგიების, კერძოდ, განახლებადი ენერგეტიკის მიმართულებითაც.
ფაშინიანი განსაკუთრებით შეეხო ახალი ატომური ელექტროსადგურის მშენებლობის თემას.
„თქვენ იცით, რომ ჩვენ რუსეთის ფედერაციასთან ახალი ატომური ელექტროსადგურის მშენებლობის საკითხსაც განვიხილავთ“, - აღნიშნა მან.
ამავდროულად, პრემიერმა ხაზგასმით აღნიშნა, რომ ამ საკითხში სომხეთი ღია და მრავალმხრივ ფორმატში მოქმედებს.
„ჩვენ აბსოლუტურად გამჭვირვალე ვართ, რადგან არ ვმალავთ, რომ ამ საკითხებს განვიხილავთ არა მხოლოდ რუს, არამედ სხვა პარტნიორებთანაც, რადგან ვეძებთ სომხეთის რესპუბლიკისთვის ყველაზე ხელსაყრელ შეთავაზებას“, - თქვა ფაშინიანმა.