სომხეთს ნატოში გაწევრიანების არანაირი პრეტენზია არ აქვს։ სარგის ხანდანიანი

სომხეთს ნატოსთან აქვს თანამშრომლობის გარკვეული ჩარჩო, თუმცა არ აქვს არანაირი პრეტენზია ალიანსში გაწევრიანებაზე․

„არმენპრესის“ ინფორმაციით, ამის შესახებ ჟურნალისტებთან საუბრისას განაცხადა სომხეთის ეროვნული ასამბლეის საგარეო ურთიერთობათა მუდმივმოქმედი კომიტეტის თავმჯდომარემ სარგის ხანდანიანმა, სომხეთში ნატოს შესაძლო ყოფნის საკითხზე კომენტარის გაკეთებისას.

„სომხეთში ნატოს ყოფნა ვერ იქნება, რადგან პირველ რიგში სომხეთს არ აქვს ნატოში გაწევრიანების არანაირი პრეტენზია. სომხეთს აქვს ნატოსთან თანამშრომლობის გარკვეული ჩარჩო, რომელიც არანაირად არ გულისხმობს ნატოს ფიზიკურ ყოფნას სომხეთის რესპუბლიკის ტერიტორიაზე“, – განაცხადა ხანდანიანმა.

ხანდანიანმა მიზანშეწონილად არ ჩათვალა ნატოს შესაძლო ყოფნაზე საუბარი სომხეთსა და აშშ-ს შორის ერთობლივი TRIPP პროექტის კონტექსტში.

სომხეთის რესპუბლიკა იმუშავებს ამერიკის შეერთებულ შტატებთან და ურთიერთშეთანხმებულ მესამე მხარეებთან, რათა განსაზღვროს სომხეთის რესპუბლიკის ტერიტორიაზე „ტრამპის მარშრუტი საერთაშორისო მშვიდობისა და კეთილდღეობისათვის“ („Trump Route for International Peace and Prosperity“ – TRIPP) საკომუნიკაციო პროგრამის განხორციელების ჩარჩო.

მოგვიანებით სომხეთის პრემიერ-მინისტრმა ეროვნულ ასამბლეაში განაცხადა, რომ „ტრამპის მარშრუტის“ სამშენებლო სამუშაოების დაწყება 2026 წლის მეორე ნახევარშია დაგეგმილი։

„წლის ბოლომდე ყველა დეტალი ქაღალდზე უნდა იყოს აღწერილი։ 2026 წლის პირველ ნახევარში უნდა შევათანხმოთ, ხოლო მეორე ნახევარში სამშენებლო სამუშაოები უნდა დავიწყოთ. ეს არის გეგმა“, – განაცხადა პრემიერ-მინისტრმა.