სომხეთის რესპუბლიკიდან ექსპორტირებული ბოთლირებული კონიაკის უმეტესობა ხარისხიანია და აკმაყოფილებს ყველა სტანდარტს: პაპოიანი

სომხეთის რესპუბლიკიდან გამავალი ბოთლირებული კონიაკის დიდი უმრავლესობა შესაფერისი ხარისხისაა და შეესაბამება კონიაკისთვის დაწესებულ ყველა სტანდარტს. როგორც „არმენპრესი“ იტყობინება, ამის შესახებ სოციალურ ქსელ „ფეისბუქის“ საკუთარ გვერდზე დაწერა სომხეთის რესპუბლიკის ეკონომიკის მინისტრმა გევორგ პაპოიანმა, რომელმაც სომხეთიდან კონიაკის ექსპორტის სტატისტიკა გააცნო.

„როგორც მოგეხსენებათ, ვიზიტისას საქართველოში შევთანხმდით, რომ შეგვექმნა სამუშაო ჯგუფი, რომელიც დაკომპლექტდებოდა სომხეთის რესპუბლიკის ეკონომიკის და საქართველოს სოფლის მეურნეობისა და გარემოს დაცვის სამინისტროების წარმომადგენლებით, რათა მოგვეგვარებინა ის პრობლემები, რომლებიც წარმოიშვა ქართული ბაზრისთვის სომხური კონიაკის (ბრენდის) ექსპორტისას. ამ სამუშაო ჯგუფის ყოველდღიური მუშაობის შედეგად დღეს უკვე შემიძლია ვთქვა, რომ კონიაკის ექსპორტის საკითხი არსებითად მოგვარდა. მაგალითად, გუშინ, საქართველოს კოლეგებმა გადმოგვცეს მონაცემები, რომლის თანახმადაც, დღის განმავლობაში ბოთლირებული კონიაკით დატვირთული 27 სატვირთო მანქანა გამოვიდა საქართველოს საზღვარზე მდებარე გეზის საბაჟო პუნქტიდან. მხოლოდ 1 მანქანამ ვერ გაიარა ექსპერტიზა.

ეს სტატისტიკაც ადასტურებს, რომ სომხეთიდან გამავალი ბოთლირებული კონიაკის უდიდესი ნაწილი (ამ შემთხვევაში 96%-ზე მეტი) არის მაღალი ხარისხის და აკმაყოფილებს ყველა სტანდარტს, რომლებიც კონიაკის მიმართ არსებობს“, - დაწერა მინისტრმა და მადლობა გადაუხადა კონიაკის მწარმოებლებს მოთმინებისთვის, გაგებისთვის და მაღალი ხარისხის პროდუქციის წარმოებისთვის.