3 წუთი კითხვის
ქალაქ დილიჯანში, 21 ივნისს, უკვე მესამედ ჩატარდება სომხურ-ქართული კულტურულ-კულინარიული ფესტივალი „მიმინო“. როგორც „არმენპრესი“-ს პრესცენტრში გამართულ პრესკონფერენციაზე აღნიშნა სომხეთის ტურიზმის ფედერაციის პრეზიდენტმა მეხაკ აპრესიანმა, ღონისძიება მრავალფეროვანი პროგრამით წარდგება: კულინარია, ხელოვნება, მუსიკა, სიმღერა, ცეკვა და კონკურსები. ფესტივალის ფარგლებში სომხური და ქართული გუნდები ტრადიციულ გემოს წარმოადგენს თავიანთ პავილიონებში და ერთმანეთს ეროვნული სამზარეულოს მრავალფეროვნებით შეეჯიბრებიან. კულტურულ და მუსიკალურ ზონებში წარმოდგენილი იქნება ორივე ქვეყნის სიმღერა, ცეკვა, მუსიკა, ხელოვნებისა და ხელსაქმის ნიმუშები.
„ეს ძალიან მნიშვნელოვანი ინიციატივაა. მსგავსი ღონისძიებები მნიშვნელოვნად უწყობს ხელს ხალხებს შორის კულტურული დიალოგისა და მეგობრული ურთიერთობების განმტკიცებასა და განვითარებას. იმ აქტივობას, რაც ფესტივალის დროს შეიმჩნევა, ვერაფერი შეედრება. ფესტივალს ბევრი სტუმარი და ტურისტი ესწრება როგორც საქართველოდან, ისე სხვა ქვეყნებიდან“, – განაცხადა მეხაკ აპრესიანმა.
ფესტივალის ორგანიზებას მხარს უჭერს სომხეთის რესპუბლიკის ეკონომიკის სამინისტროს ტურიზმის კომიტეტი, რომელიც რეგიონებში ფესტივალების ჩატარებას პრიორიტეტულად მიიჩნევს. ტურიზმის კომიტეტის მარკეტინგისა და ხელშეწყობის დეპარტამენტის ხელმძღვანელმა დიანა კარაპეტიანმა აღნიშნა, რომ სომხეთში ფესტივალური ტურიზმი სწრაფად ვითარდება.
„უკვე შეგვიძლია დარწმუნებით ვთქვათ, რომ ტურისტული პროდუქტების შორის გვაქვს ფესტივალური ტურიზმი, როგორც დამოუკიდებელი შეთავაზება. წლების განმავლობაში ჩამოყალიბდა ისეთი ფესტივალები, რომელთა გამო მრავალი ტურისტი ჩამოდის სხვადასხვა ქვეყნიდან. ანუ ისინი სწორედ ამ ღონისძიებებისთვის სტუმრობენ სომხეთს. მაგალითად, ერევნის ღვინის დღეები, არენის ღვინის ფესტივალი და სხვანი“, – განაცხადა დიანა კარაპეტიანმა.
ფესტივალებს დიდი მნიშვნელობა აქვს ასევე მასპინძელი და მიმდებარე თემების სოციალურ-ეკონომიკური განვითარებისა და საერთაშორისო ცნობადობისთვის. სპეციალისტების თქმით, ფესტივალების ჩატარება ხელს უწყობს თემებში საოჯახო სასტუმროების განვითარებას, ინფრასტრუქტურის გაუმჯობესებას, ტრანსპორტისა და კვების ობიექტების გააქტიურებას და სხვა მიმართულებებს.