საბერძნეთთან ურთიერთობებს სომხეთისთვის განსაკუთრებული მნიშვნელობა აქვს: ვაჰაგნ ხაჩატურიანი

საბერძნეთთან ურთიერთობებს სომხეთისთვის განსაკუთრებული მნიშვნელობა აქვს, რაც განპირობებულია ორი ქვეყნის ცივილიზაციური და კულტურული კავშირებით.

„არმენპრესის“ კორესპონდენტის ცნობით, ამის შესახებ საბერძნეთის პრეზიდენტ კონსტანტინოს ტასულასთან პირისპირ შეხვედრისას განაცხადა სომხეთის პრეზიდენტმა ვაჰაგნ ხაჩატურიანმა, რომელიც საბერძნეთში სახელმწიფო ვიზიტით 17 თებერვალს ჩავიდა.

„სიხარულით აღვნიშნავთ, რომ ჩვენმა ურთიერთობებმა დინამიკური განვითარება ჰპოვა სხვადასხვა სფეროში: პოლიტიკურ, ეკონომიკურ, კულტურულ, სამეცნიერო და საგანმანათლებლო. ბოლო წლები ჩვენი ქვეყნისთვის რთული იყო, თუმცა მოქმედმა ხელისუფლებამ, მთავრობამ და პოლიტიკურმა გუნდმა შეძლეს ამ სირთულეების გადალახვა. ეს ასევე ჩვენი მეგობარი ქვეყნების წყალობით მოხდა“, - განაცხადა სომხეთის პრეზიდენტმა.

ვაჰაგნ ხაჩატურიანმა ხაზგასმით აღნიშნა, რომ სომხეთის მისწრაფებაა დაუახლოვდეს ევროპულ ღირებულებებს.

სომხეთის პრეზიდენტი ასევე შეეხო 2025 წლის 8 აგვისტოს ვაშინგტონში, აშშ-ის პრეზიდენტ დონალდ ტრამპის მოწმეობით, სომხეთსა და აზერბაიჯანს შორის ხელმოწერილ დეკლარაციას, მისგან გამომდინარე შესაძლებლობებს და განსაკუთრებით სამხრეთ კავკასიაში მშვიდობის დამყარებისკენ მიმართულ ძალისხმევას.

სიტყვის დასასრულს, სომხეთის პრეზიდენტმა საბერძნეთის პრეზიდენტი სომხეთში მიიწვია.