მირზოიანმა და ივანოვიჩმა განიხილეს სომხეთ-ჩერნოგორიის ეკონომიკური და სავაჭრო თანამშრომლობის განვითარების კონკრეტული შესაძლებლობები

სომხეთის საგარეო საქმეთა სამინისტროში 31 მარტს გაიმართა არარატ მირზოიანის შეხვედრა ჩერნოგორიის საგარეო და ევროპულ საქმეთა ვიცე-პრემიერთან ფილიპ ივანოვიჩთან.

როგორც „არმენპრესი“ იუწყება, სომხეთის საგარეო საქმეთა სამინისტროს მიერ გავრცელებული ინფორმაციით, შეხვედრაზე მხარეებმა კმაყოფილებით აღნიშნეს ბოლო წლებში სომხეთსა და ჩერნოგორიას შორის პოლიტიკური დიალოგის აქტიური დინამიკა, ასევე ცალკეული სფეროების თანამშრომლობის გაფართოებისთვის გაწეული ერთობლივი ძალისხმევა. კერძოდ, გამოიკვეთა სამართლებრივი ბაზის გაფართოების, ტურიზმის სფეროში მოცულობების მნიშვნელოვანი ზრდის, ინფორმაციული ტექნოლოგიებისა და ინოვაციური განათლების მიმართულებით განხორციელებული ერთობლივი პროექტების მნიშვნელობა.

არარატ მირზოიანმა და ფილიპ ივანოვიჩმა განიხილეს ეკონომიკური და სავაჭრო თანამშრომლობის განვითარების კონკრეტული შესაძლებლობები და ხაზგასმით აღნიშნეს ორ ქვეყანას შორის მოქმედი კომპანიებისთვის „გზამკვლევის“ შექმნის მნიშვნელობა, როგორც პრიორიტეტული პრაქტიკული ნაბიჯი.

მინისტრებმა სიმბოლურად მიიჩნიეს ის ფაქტი, რომ პოდგორიცა იყო პირველი ქალაქი, რომელთანაც ერევანმა თანამშრომლობის შეთანხმება გააფორმა, და გამოთქვეს მზადყოფნა ამ ფორმატით თანამშრომლობის ეფექტიანად გაგრძელებისკენ.

სომხეთისა და ჩერნოგორიის საგარეო საქმეთა მინისტრებმა ასევე გაცვალეს მოსაზრებები ევროკავშირთან თანამშრომლობის საკითხებზე. სომხეთის საგარეო საქმეთა მინისტრმა წარმოადგინა სომხეთ-ევროკავშირის ურთიერთობებში ბოლო წლებში მიღწეული პროგრესი და ხაზგასმით აღნიშნა რეფორმების განხორციელების საუკეთესო გამოცდილების გაზიარების მნიშვნელობა ევროკავშირთან თანამშრომლობის გაღრმავების გზაზე.

შეხვედრის დროს განხილულ იქნა რეგიონული განვითარებები. მინისტრმა მირზოიანმა ხაზი გაუსვა სომხეთის პოზიციას აზერბაიჯანთან მშვიდობის შეთანხმების ხელმოწერის საკითხში და აღნიშნა, რომ ორმხრივი მზადყოფნის შემთხვევაში შესაძლებელია მნიშვნელოვან ეტაპს მიღწევა.