აზერბაიჯანმა ცეცხლი გახსნა სიუნიქის ოლქის ხნაწახის დასახლების მიმართულებით։ სომხეთის თავდაცვის სამინისტრო

აზერბაიჯანის შეიარაღებული ძალების დანაყოფებმა 31 მარტს, დაახლოებით 00:50 საათზე, ცეცხლი გახსნეს სიუნიქის ოლქის ხნაწახის დასახლების მიმართულებით, რის შედეგადაც დაზიანდა საცხოვრებელი სახლი.

როგორც „არმენპრესი“ იუწყება, ამის შესახებ ინფორმაციას ავრცელებს სომხეთის თავდაცვის სამინისტრო, რომელიც ფაქტს ამტკიცებს შესაბამისი ფოტომასალით.

დაშავებულები არ არიან.

ამასთან, სომხეთის თავდაცვის სამინისტრო უარყოფს აზერბაიჯანის თავდაცვის სამინისტროს განცხადებას, რომლის მიხედვითაც, თითქოს 30 მარტს, 22:30 საათიდან 31 მარტის 04:35 საათამდე, სომხეთის შეიარაღებული ძალების დანაყოფებმა ცეცხლი გახსნეს საზღვრის აღმოსავლეთ და სამხრეთ-აღმოსავლეთ ნაწილებში განლაგებული აზერბაიჯანული პოზიციების მიმართულებით.

„გახსენებთ, რომ სომხეთის რესპუბლიკის პრემიერ-მინისტრის აპარატმა შესთავაზა, შეიქმნას სომხეთ-აზერბაიჯანის ერთობლივი მექანიზმი ცეცხლის შეწყვეტის რეჟიმის დარღვევის შემთხვევების და/ან ამგვარი ინფორმაციის გამოძიებისთვის, რაზეც აზერბაიჯანმა დღემდე არ უპასუხა.

სომხეთის რესპუბლიკის თავდაცვის სამინისტრო ადასტურებს, რომ პრემიერ-მინისტრის აპარატის პოზიციასთან შესაბამისობაში, მზად არის გამოიძიოს აზერბაიჯანის თავდაცვის სამინისტროს განცხადებაში მოყვანილი ფაქტები, იმ შემთხვევაში, თუ ეს მტკიცებულებები სომხურ მხარეს გადაეცემა.
ამასთან, აზერბაიჯანულ მხარეს მოვუწოდებთ, გამოიძიონ ხნაწახის დასახლების საცხოვრებელი სახლის დაბომბვის ფაქტი და წარმოადგინონ საჯარო განმარტებები“, – აღნიშნულია სომხეთის თავდაცვის სამინისტროს განცხადებაში.