ევროკავშირში არსებობს კონსენსუსი, რომ სომხეთის უსაფრთხოება ევროპული ოჯახის უსაფრთხოების ნაწილია: ეღოიანი
2 წუთი კითხვის
სომხეთის ეროვნული კრების ევროპის ინტეგრაციის საკითხთა მუდმივმოქმედი კომიტეტის თავმჯდომარემ, არმენ ეღოიანმა განაცხადა, რომ ევროკავშირში არსებობს კონსენსუსი, რომ სომხეთის უსაფრთხოება განიხილება, როგორც ევროპული ოჯახის უსაფრთხოების ნაწილი.
„არმენპრესის“ ინფორმაციით, ამის შესახებ არმენ ეღოიანმა სომხეთის პარლამენტში გამართულ ევროკავშირი-სომხეთის საპარლამენტო პარტნიორობის კომიტეტის მეოთხე სხდომაზე განაცხადა.
არმენ ეღოიანმა აღნიშნა, რომ ამას ადასტურებს ის ფაქტი, რომ ევროკავშირმა მიიღო გადაწყვეტილება სომხეთისთვის დახმარების გაწევის შესახებ ევროპის მშვიდობის ფონდის ფარგლებში.
„მშვიდობის ინსტრუმენტებიდან სომხეთისთვის დახმარების გაწევამ აჩვენა, რომ ევროკავშირში არსებობს კონსენსუსი, რომ სომხეთის რესპუბლიკის უსაფრთხოება განიხილება, როგორც ევროპული ოჯახის უსაფრთხოების ნაწილი. ნებისმიერი არასტაბილურობა, რომელიც დაიწყო ევროკავშირის საზღვრებთან ახლოს, თავდაპირველად სწორედ ჩვენი რეგიონიდან დაიწყო. ეს ერთხელ უკვე ვიხილეთ. ვფიქრობ, ევროკავშირი არ დაუშვებს, რომ ეს კიდევ ერთხელ განმეორდეს“, – განაცხადა ეღოიანმა.
მან ასევე განსაკუთრებით მნიშვნელოვანია მიიჩნია ევროკავშირის სამოქალაქო მისიის განთავსება სომხეთში, სომხეთ-აზერბაიჯანის საზღვრის სომხურ მხარეს.
„ეს გადაწყვეტილება რეკორდულად მოკლე დროში იქნა მიღებული. ჩვეულებრივ, ასეთი გადაწყვეტილებების მიღება და მათი განხილვა თვეებს მოითხოვს, მაგრამ ეს გადაწყვეტილება რამდენიმე კვირის განმავლობაში იქნა მიღებული“, – აღნიშნა ეღოიანმა.