რუსეთი სომხეთის სუვერენულ უფლებად მიიჩნევს ევროკავშირში გაწევრიანების პროცესის დაწყების გადაწყვეტილებას

რუსეთის პრეზიდენტის პრესმდივანმა დმიტრი პესკოვმა კომენტარი გააკეთა ეროვნული ასამბლეის მიერ ევროკავშირში გაწევრიანების პროცესის დაწყების შესახებ კანონპროექტის დამტკიცებაზე.

„არმენპრესის“ ინფორმაციით, როგორც TASS-ის სააგენტო იუწყება, პესკოვმა განაცხადა, რომ ეს სომხეთის სუვერენული უფლებაა.

„ეს სომხეთის სუვერენული უფლებაა. თუმცა, საჭიროა, რომ როგორც თავად სომეხმა ხალხმა, ასევე სხვებმა გააცნობიერონ, რამდენად არის ეს პროცესი ურთიერთსასურველი და როგორ უყურებენ ამას ევროპელები. როგორც ჩანს, სომხეთში არიან პოლიტიკოსები, რომლებიც ფიქრობენ, რომ ევროკავშირისკენ ორიენტაცია ქვეყანას და ხალხს დამატებით დივიდენდებს მოუტანს, მიუხედავად იმისა, რომ გაურკვეველია, რამდენად არის ამით დაინტერესებული ევროკავშირი“, - განაცხადა პესკოვმა.

რუსეთის პრეზიდენტის პრესმდივანმა ასევე აღნიშნა, რომ სომხეთი განაგრძობს დივიდენდების მიღებას ევრაზიულ ეკონომიკურ კავშირში წევრობით და ეს სარგებელი აშკარაა.

სომხეთის ეროვნულმა ასამბლეამ 12 თებერვალს პირველი მოსმენით დაამტკიცა ევროკავშირში გაწევრიანების პროცესის დაწყების შესახებ კანონპროექტი. კანონპროექტს მხარი დაუჭირა 63-მა დეპუტატმა, წინააღმდეგი იყო 7. „სამოქალაქო შეთანხმების“ მმართველი ფრაქციის წევრებმა მხარი დაუჭირეს კანონპროექტს, ოპოზიციურმა ფრაქციამ „პატივი მაქვს“ წინააღმდეგ მისცა ხმა, ხოლო „სომხეთის“ ფრაქციამ კენჭისყრაში მონაწილეობა არ მიიღო.