სომხეთის იუსტიციის მინისტრის მოადგილემ ევროსაბჭოს პარტნიორებთან დღის წესრიგის საკითხები განიხილა

სომხეთის რესპუბლიკის იუსტიციის მინისტრის მოადგილე ანა კარაპეტიანმა მიიღო ევროსაბჭოს ადამიანის უფლებების, იუსტიციისა და სამართლებრივი თანამშრომლობის სტანდარტების დეპარტამენტის ხელმძღვანელის, ლილია გრეთარსდოტირის ხელმძღვანელობით დელეგაცია.

„არმენპრესის“ ინფორმაციით, სომხეთის იუსტიციის სამინისტროს ცნობით, ანა კარაპეტიანმა მადლობა გადაუხადა ევროპული ღირებულებების, სტანდარტებისა და პროცედურების დანერგვისთვის, დამოუკიდებელი სასამართლო სისტემის ჩამოყალიბებისთვის, სამართლებრივი და კორუფციის საწინააღმდეგო ინსტიტუციური მექანიზმების შექმნისა და განმტკიცების რეფორმების დღის წესრიგისადმი გამოჩენილი მუდმივი მხარდაჭერისთვის.

ორივე მხარემ მაღალი შეფასება მისცა სომხეთსა და ევროსაბჭოს შორის 2023-2026 წლების ქმედებათა პროგრამის განხორციელების (დაფინანსების) დონეს, ასევე მისი ფარგლებში იუსტიციის სამინისტროს რეფორმების დღის წესრიგის თითქმის ყველა მიმართულებით პროგრამების განხორციელებას, მათ შორის ადამიანის უფლებების, მართლმსაჯულების, კორუფციის წინააღმდეგ ბრძოლისა და სხვა სფეროებში.

შეხვედრაზე ხაზგასმით აღინიშნა ვენეციის კომისიასა და ევროსაბჭოს ადამიანის უფლებებისა და სამართლის უზენაესობის გენერალურ დირექტორატთან ჩამოყალიბებული სტაბილური თანამშრომლობა.

განხილული იქნა სასამართლო კოდექსი, სისხლის სამართლის კანონმდებლობა, ასევე ადამიანის უფლებათა დაცვის სფეროში შემუშავებული საკანონმდებლო ინიციატივები და 2024 წლის განმავლობაში მიღებული და განხილვის პროცესში არსებული კანონპროექტების პაკეტებზე ექსპერტული მოსაზრებები.

სტუმრების თხოვნით, მინისტრის მოადგილემ განიხილა დავების ალტერნატიული გადაწყვეტის მექანიზმები და გამოთქვა რწმენა, რომ ევროსაბჭოს წევრი ქვეყნების არბიტრების ჩართულობა მიმდინარე წლის შემოდგომაზე დაგეგმილი „არბიტრაჟის კვირეულის“ მუშაობაში ახალ სტიმულს მისცემს ამ ინსტიტუტის განვითარებას.

შეხვედრაზე ასევე განხილულ იქნა ადამიანის უფლებათა ევროპული სასამართლოს გადაწყვეტილებების შემსწავლელი უწყებათაშორისი კომისიის მუშაობა.

შეხვედრის დასასრულს, ანა კარაპეტიანმა ევროსაბჭოს პარტნიორებს გადასცა იუსტიციის სამინისტროს პრიორიტეტების დოკუმენტი, შემდგომი თანამშრომლობის კონკრეტული დღის წესრიგის შესამუშავებლად.