ერევანი ცდილობს, გაითვალისწინოს მოსკოვის ინტერესები საერთაშორისო პლატფორმებზე და იგივე მოლოდინი აქვს მოსკოვისგან: მირზოიანი

სომხეთის საგარეო საქმეთა მინისტრმა, არარატ მირზოიანმა განაცხადა, რომ ერევანი მუდმივად ცდილობს საერთაშორისო პლატფორმებზე გაითვალისწინოს რუსეთის ინტერესები და სურვილი აქვს, რომ მოსკოვმაც გარკვეულწილად გაითვალისწინოს სომხეთის რესპუბლიკის ინტერესები.

„არმენპრესის“ ინფორმაციით, ამის შესახებ სომხეთის საგარეო საქმეთა მინისტრმა არარატ მირზოიანმა, რუსეთის საგარეო საქმეთა მინისტრ სერგეი ლავროვთან მოსკოვში მიმდინარე მოლაპარაკებებისას განაცხადა.

მისი თქმით, საერთაშორისო პლატფორმებზე თანამშრომლობა ორმხრივი ურთიერთობების დღის წესრიგის ნაწილია და ერევანი მიზნად ისახავს ამ ტრადიციის გაგრძელებას.

„მნიშვნელოვანი ასპექტია საერთაშორისო პლატფორმებზე თანამშრომლობა. ჩვენ ყოველთვის ვცდილობთ გავითვალისწინოთ რუსეთის ფედერაციის ინტერესები, და სურვილი გვაქვს, რომ რუსულმა მხარემაც გარკვეულწილად გაითვალისწინოს სომხეთის რესპუბლიკის ინტერესები“, – აღნიშნა არარატ მირზოიანმა.

მირზოიანმა ასევე აღნიშნა, რომ სომხეთი მზადაა განავითაროს ურთიერთობები რუსეთთან ურთიერთსასარგებლო პარტნიორობისა და სუვერენიტეტის მიმართ ურთიერთპატივისცემის საფუძველზე, რაც შეესაბამება ორივე ქვეყნის ინტერესებს.

სომხეთის საგარეო საქმეთა მინისტრმა ხაზი გაუსვა, რომ სომხეთ-რუსეთის ურთიერთობების მნიშვნელოვანი კომპონენტია ეკონომიკური პარტნიორობა, სადაც შეინიშნება სტაბილურად დადებითი ტენდენცია, რაც დადებით გავლენას ახდენს სავაჭრო ურთიერთობებზე.