აზერბაიჯანს შევთავაზეთ და კვლავ ვთავაზობთ რაც შეიძლება მალე დაიწყოს კომუნიკაციების განბლოკვის პროცესის განხორციელება: საგარეო საქმეთა სამინისტროს პრესსპიკერი

ერევანი, 14 ოქტომბერი, არმენპრესი. სომხეთის საგარეო საქმეთა სამინისტროს პრესსპიკერმა ანი ბადალიანმა უპასუხა აზერბაიჯანის საგარეო საქმეთა სამინისტროს პრესსპიკერის განცხადებას, რომელშიც სომხეთი დაადანაშაულა 2020 წლის 9 ნოემბრის სამმხრივი განცხადების ვალდებულებების არაჯეროვან შესრულებაში რეგიონული კომუნიკაციების განბლოკვის კონტექსტში. სომხეთის საგარეო საქმეთა სამინისტროს პრესსპიკერმა „არმენპრესთან“ ინტერვიუში უპასუხა ბაქოდან გაკეთებულ განცხადებას.

კითხვა - ქალბატონო ბადალიან. აზერბაიჯანის საგარეო საქმეთა სამინისტროს სპიკერმა კომენტარი გააკეთა „მშვიდობის გზაჯვარედინი: უსაფრთხოებისა და დემოკრატიის გაერთიანება“ კონფერენციაზე 2020 წლის 9 ნოემბრის სამმხრივი განცხადების რამდენიმე პუნქტის შესახებ სომხეთის პრემიერ-მინისტრ ნიკოლ ფაშინიანის მიერ გაკეთებულ შეფასებებზე და ისინი სიმართლის დამახინჯებად და სომხეთის რესპუბლიკის მიერ ნაკისრი ვალდებულებების დაუდევრად შესრულებად დაახასიათა. როგორ შეაფასებთ აზერბაიჯანის საგარეო საქმეთა სამინისტროს პრესსპიკერის ნათქვამს?

პასუხი - ფაქტებს უნდა მივხედოთ. 2020 წლის 9 ნოემბრის სამმხრივი განცხადების მიხედვით, მთიან ყარაბაღში უნდა იყვნენ რუსი სამშვიდობოები, ასევე 5 კმ სიგანის ლაჩინის დერეფანი რუსი სამშვიდობოების კონტროლის ქვეშ, მაგრამ არ არსებობს არც ლაჩინის დერეფანი და არც რუსი სამშვიდობოები.

2020 წლის 9 ნოემბრის სამმხრივი განცხადების მიხედვით, დევნილები და ლტოლვილები ბრუნდებიან მთიანი ყარაბაღისა და მიმდებარე ტერიტორიებზე გაეროს ლტოლვილთა საკითხების უმაღლესი კომისრის ოფისის კონტროლის ქვეშ, მაგრამ აზერბაიჯანი აცხადებს, რომ მთიანი ყარაბაღის ტერიტორია არ არსებობს, მთიანი ყარაბაღი არ არსებობს, რაც, ფაქტობრივად, ნიშნავს ამ ვალდებულების შესრულებაზე უარის თქმას. დღემდე არც ერთი სომეხი ლტოლვილი ან დევნილი არ დაბრუნებულა არც მთიან ყარაბაღში, არც მიმდებარე ტერიტორიებზე.

2020 წლის 9 ნოემბრის სამმხრივი განცხადებით გათვალისწინებულია ტყვეთა, მძევლებსა და სხვა დაკავებულ პირთა გაცვლა. დღემდე აზერბაიჯანის ციხეებში სომხები იმყოფებიან, მათ შორის ტყვედ ჩავარდნილნი 2020 წლის ნოემბერში ან ოქტომბერში. აზერბაიჯანი აცხადებს, რომ ისინი ტყვეები არ არიან. თუ ისინი ტყვეები არ არიან, მაშინ მძევლები ან სხვა დაკავებული პირები არიან. სამმხრივი განცხადების ფორმულირება მოიცავს ნებისმიერი პირის გათავისუფლებას.

აზერბაიჯანი ასევე მუდმივად აყენებს დაკარგული პირების საკითხს. სომხეთის რესპუბლიკაც ამ საკითხს აყენებს, რადგან ორი ომის შედეგად დაახლოებით ათასი სომეხი დაკარგულია, და ჩვენ მზად ვართ ამ საკითხშიც ვითანამშრომლოთ.

რაც შეეხება სამმხრივი განცხადების მე-9 პუნქტს, მასში მითითებულია, რომ სომხეთის რესპუბლიკა საკუთარ ტერიტორიაზე უზრუნველყოფს ტვირთების, სატრანსპორტო საშუალებების და ადამიანების მოძრაობას და უზრუნველყოფს მათ უსაფრთხოებას. ეს ძალიან მარტივად წერია განცხადებაში. ცხადია, რომ ეს სომხეთის რესპუბლიკამ უნდა გააკეთოს თავისი იურისდიქციისა და სუვერენიტეტის ფარგლებში. რაც შეეხება რუსეთის ფედერაციის სასაზღვრო სამსახურის წარმომადგენლებს, სამმხრივი განცხადების მე-9 პუნქტით მათი ფიზიკური ყოფნა გათვალისწინებული არ არის.

სომხეთის მთავრობის „მშვიდობის გზაჯვარედინი“ პროექტი ზუსტად გამოხატავს სომხეთის რესპუბლიკის მიერ ნაკისრი ვალდებულებების შესრულების სამოქმედო გეგმას, რომლის ფარგლებში ჩვენ წინადადებები გადავეცით აზერბაიჯანულ მხარეს. დაინტერესებული ვართ რეგიონში ყველა სატრანსპორტო და ეკონომიკური ინფრასტრუქტურის განბლოკვით, რაც სამმხრივი განცხადების მიხედვით გათვალისწინებულია. ჩვენ აზერბაიჯანს შევთავაზეთ და კვლავ ვთავაზობთ რაც შეიძლება მალე დაიწყოს განბლოკვის პროცესის განხორციელება.