2 րոպեի ընթերցում
ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ: Հայտնի բանաստեղծ, արձակագիր, թարգմանիչ և հրապարակախոս Հրաչյա Հովհաննիսյանի 100-ամյակի կապակցությամբ «ՀայՓոստ»-ը մարեց և շրջանառության մեջ դրեց «Մեծանուն հայեր. Հրաչյա Հովհաննիսյանի ծննդյան 100-ամյակը» թեմայով նամականիշը:
«Արմենպրես»-ի հաղորդմամբ`նամականիշի մարման հանդիսավոր արարողությունը տեղի ունեցավ դեկտեմբերի 11-ին Հայաստանի գրողների միությունում:
Մարումն իրականացրին «ՀայՓոստ» ՓԲԸ-ի գլխավոր գործադիր տնօրեն Հայկ Ավագյանը, Հայաստանի գրողների միության նախագահ Էդվարդ Միլիտոնյանը, ՀՀ բարձր տեխնոլոգիական արդյունաբերության նախարար Հակոբ Արշակյանը, կրտսեր Հրաչյա Հովհաննիսյանը և Հայաստանի ֆիլատելիստների միության նախագահ Հովիկ Մուսայելյանը:
«Հրաչյա Հովհաննիսյանը մեծատաղանդ բանաստեղծ էր, որին շատ էին սիրում, և նրա հոբելյանի կապակցությամբ այսօր ծաղիկներ խոնարհեցինք նրա գերեզմանին, օրը նշանավորեցինք Տերյան, 59 հասցեում Հովհաննիսյանի հիշատակը հավերժացնող հուշատախտակի բացմամբ: Նախատեսում ենք հաջորդ տարվա սկզբին Գրողների միության մեծ դահլիճում նշել Հովհաննիսյանի 100-ամյակը` գրողների շրջանակում, իսկ հետո պետական, կառավարական հանդիսություն կիրականացվի»,-տեղեկացրեց Էդվարդ Միլիտոնյանը:
120 ՀՀ դրամ անվանական արժեքով նամականիշը տպագրված է Ֆրանսիայի «Cartor» տպագրատանը` 60 000 տպաքանակով: Նամականիշի դիզայնի հեղինակն է «ՀայՓոստ» ՓԲԸ-ի դիզայներ Դավիթ Դովլաթյանը:
Նամականիշի վրա պատկերված է Հրաչյա Հովհաննիսյանը: Նամականիշի խորապատկերին ներկայացված են հատվածներ հեղինակի բանաստեղծություններից: