2 րոպեի ընթերցում
ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: Ֆրանսիացի հետազոտողները նախագծում են մագնիսառեզոնանսային տոմոգրաֆիայի (ՄՌՏ) հզորագույն սարք, որը թույլ կտա ավելի ճշգրիտ ախտորոշել վաղ փուլերում այնպիսի հիվանդություններ, ինչպիսին Է, օրինակ, Պարկինսոնի հիվանդությունը: Այդ մասին, ինչպես տեղեկացնում Է «Արմենպրես»-ը, հայտնել Է Reuters գործակալությունը:
Սարքի հիմքում, որը մշակում են Iseult ծրագրի շրջանակներում Ֆրանսիայի ատոմային Էներգիայի եւ Էներգիայի այլընտրական աղբյուրների կոմիսարիատի հովանու ներքո, գտնվում Է հզոր մագնիս՝ 5 մետր երկարությամբ եւ 130 տոննա քաշով գլանի տեսքով: Գիտնականների խոսքով՝ սարքը հարյուր անգամ ավելի մանրամասնեցված պատկեր Է տալու ժամանակակից նմանօրինակների համեմատությամբ: Դրա ստեղծման աշխատանքը դեռեւս չի ավարտվել. հետազոտողներն ակնկալում են առաջին պատկերներն ստանալ 2020 թվականի վերջին-2021 թվականի սկզբին:
«Ըստ մեր հաշվարկների, սարքը թույլ կտա հիվանդություններն ախտորոշել ավելի վաղ փուլում եւ ավելի ստույգ հետեւել դրանց ընթացքին»,-գործակալությունը մեջբերում Է նախագծի գիտական տնօրեն Նիկոլ Բուլանի խոսքը: Նրա ասելով՝ սարքի օգտագործման շնորհիվ կհաջողվի ավելի ստույգ տվյալներ ստանալ գլխուղեղի կառուցվածքի եւ դրանում ընթացող կենսաքիմիական գործընթացների վերաբերյալ, հաղորդել Է ՏԱՍՍ-ը: