Նախկին ոստիկանապետ Հայկ Հարությունյանը Մարտի 1-ի գործով հարցաքննվել է որպես վկա

ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ նախկին ոստիկանապետ, իր առանձնատանը մահացած հայտնաբերված Հայկ Հարությունյանը Մարտի 1-ի գործով հարցաքննվել էր որպես վկա: Այս մասին «Արմենպրես»-ի հարցմանն ի պատասխան տեղեկացրեց Հատուկ քննչական ծառայության մամուլի քարտուղար Մարինա Օհանջանյանը: «Առայժմ այլ մանրամասներ չենք հայտնում»,- նշեց Օհանջանյանը:

Հայկ Հարությունյանը 2003-2008 թվականներին (մինչև 2008թ. մայիսի 29-ը) զբաղեցրել է ՀՀ ոստիկանապետի պաշտոնը: Նրա դին հրազենային վնասվածքով հայտնաբերվել է 2019թ. սեպտեմբերի 23-ին: Դեպքի առթիվ հարուցվել է քրեական գործ՝ քրեական օրենսգրքի 110-րդ հոդվածի 1-ին մասի հատկանիշներով (Սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը):