1 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետություն 2019 թվականի առաջին կիսամյակում, ընդհանուր առմամբ, այցելել է 1 մլն 679 հազար անձ, և նրանցից 770 հազարը եղել է զբոսաշրջիկ:
«Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ էկոնոմիկայի նախարարության զբոսաշրջության կոմիտեի նախագահ Սուսաննա Սաֆարյանը:
«Ընդհանուր առմամբ 2018 թվականի նույն ժամանակահատվածի համեմատ այցելությունների թիվն աճել է 12.3 տոկոսով: Զբոսաշրջային այցելություններն աճել են 12.1 տոկոսով:
2018 թվականին Հայաստան է ժամանել 3.7 մլն անձ, որոնցից 1.5 մլն-ը զբոսաշրջիկներ են եղել:
Այն անձինք, ովքեր ՀՀ քաղաքացի չեն, դիտարկվում են որպես զբոսաշրջիկներ: Հիմնականում մեր երկիր այցելում են հարևան և հայկական մեծ համայնքներ ունեցող երկրներից՝ Ռուսաստանի Դաշնությունից, Վրաստանից, ԱՄՆ-ից, Իրանից, Գերմանիայից և այլ երկրներից»,- նշեց Սաֆարյանը:
Նրա խոսքով՝ աշխատանքներ են տարվում, որպեսզի հնարավոր լինի եվրոպական երկրներից ավելի շատ զբոսաշրջիկ ներգրավել դեպի Հայաստան: