Թուրքիան և ԱՄՆ-ը Սիրիայի հարցում կշարունակեն համագործակցությունը

ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ԱՄՆ նախագահ Դոնալդ Թրամփի հետ, որի ընթացքում նրանք քննարկել են Սիրիայում տիրող իրավիճակը:

Այս մասին, ինչպես հաղորդում է «Արմենպրես»-ը, հայտնում է թուրքական «Անադոլու» լրատվական գործակալությունը:

Թուրքիայի նախագահի աշխատակազմի հանրային կապերի բաժնից տեղեկացնում են, որ երկու երկրների առաջնորդները որոշել են շարունակել համագործակցությունը՝ Սիրիայի Իդլիբ նահանգում քաղաքացիներին պաշտպանելու և հումանիտար նոր ճգնաժամերը կանխելու նպատակով:

Սիրիայի հյուսիսարևմտյան Իդլիբ նահանգում սիրիական բանակը շարունակում է ռազմական գործողությունները: Վերջին օրերին տեղի ունեցած հարձակումների հետևանքով սպանվել է 15 և վիրավորվել՝ 30 հոգի: