Արայիկ Հարությունյանն Արցախի քաղաքական ուժերին կոչ արեց տարաձայնությունները լուծել սեղանի շուրջ
2 րոպեի ընթերցում
ԵՐԵՎԱՆ, 6 ՕԳՈՍՏՈՍԻ, ԱՐՄԵՆՊՐԵՍ: Արցախի «Ազատ հայրենիք» կուսակցության նախագահ Արայիկ Հարությունյանն ԱՀ բոլոր քաղաքական ուժերին կոչ է անում տարաձայնությունները լուծել սեղանի շուրջ և բանակցությունների միջոցով:
«Արմենպրես»-ի փոխանցմամբ` այս մասին Հարությունյանը խոսել է օգոստոսի 6-ին տեղի ունեցած մամուլի ասուլիսի ընթացքում:
«Մենք ունենք բավարար ռեսուրս, կամք, ցանկություն, որ սեղանի շուրջ մեր բոլոր հարցերի պատասխանները ստանանք: Այսօր ես ուզում եմ Արցախի բոլոր քաղաքական ուժերին, քաղաքական գործիչներին կոչ անել` սկսել քայլեր ձեռնարկել, նստել սեղանի շուրջ, և այն բոլոր տարաձայնությունները, որոնք կան, լուծել սեղանի շուրջ, բանակցությունների միջոցով»,- ասաց Հարությունյանը:
Արցախի «Ազատ հայրենիք» կուսակցության նախագահն, անդրադառնալով ընտրապայքարի ընթացքում բռնության հավանական կիրառմանը, նշեց, որ այն պետք է բացառել, իսկ ովքեր բռնություն կկիրառեն, պետք է պատասխանատվության ենթարկվեն:
«Մենք թույլ չենք տա, որ Ղարաբաղում բռնություն կիրառվի ոչ միայն քաղաքական գործընթացներում, այլ ընդհանուր առմամբ: Եթե տեղի է ունենում խուլիգանություն, իրավապահները գնահատական են տալիս, դա ընդունելի է, այդպես էլ պետք է լինի: Չենք կարող բացառել, որ ցանկացած պահի կարող է նման բան տեղի ունենալ, բայց բռնություն կիրառելն անթույլատրելի է, և ով փորձի օրենքը խախտել, պետք է պատասխանատվության ենթարկվի»,- նշեց նա:
Արայիկ Հարությունյանն Արցախի համար ցանկալի չհամարեց նաև նախագահական և այլ ընտրությունների ընթացքում հանրահավաքային պայքարը, և նշեց, որ պետք է քայլեր ձեռնարկել այդպիսի պայքարը կանխելու ուղղությամբ: