ԵԽ հայաստանյան գրասենյակի կազմակերպած էսսեների մրցույթի հաղթողն իր դիպլոմը կստանա Ստրասբուրգում
3 րոպեի ընթերցում
![ԵԽ հայաստանյան գրասենյակի կազմակերպած էսսեների մրցույթի հաղթողն իր դիպլոմը կստանա Ստրասբուրգում](http://armenpress.am/resized/480/static/news/b/2019/07/982841.jpg)
ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Ավագ դպրոցի աշակերտուհի Անի Կարապետյանը Եվրոպայի խորհրդի հայաստանյան գրասենյակի կողմից կազմակերպված էսսեների մրցույթի հաղթողն է: «Արմենպրես»-ի փոխանցմամբ` Անին իր դիպլոմը կստանա Ստրասբուրգում, ուր էլ կմեկնի որպես «Ապագա եվրոպացին Ձեր պատկերացմամբ» թեմայով էսսեների մրցույթի հաղթող և Հայաստանի ներկայացուցիչ:
«Իմ էսսեն ապագա եվրոպացու վերաբերյալ իմ պատկերացումների մասին էր, որին ես ցանկանում եմ ապագայում տեսնել մի փոքր ավելի վերափոխված, ավելի լավ հատկանիշներով: Կցանկանայի, որ ապագա եվրոպացիներն ավելի հոգատար և ուշադիր լինեին իրենց շրջապատի և աշխարհի նկատմամբ: Նաև կցանկանայի, որ օգնեին անշահախնդրորեն այն մարդկանց, ովքեր ունեին դրա կարիքը: Եվ օգնեին, որպեսզի այս աշխարհը դարձնեինք ավելի լավը»,- նշեց Անին:
Մրցույթը նվիրված է Եվրոպայի խորհրդի հիմնադրման 70-ամյակին: Երևանում Եվրոպայի խորհրդի գրասենյակի ղեկավար Նատալյա Վուտովան նշեց, որ այն առաջինն է, բայց շարունակական է լինելու:
«Եվրոպայի խորհրդի երեք հիմնական սկզբունքներն են մարդու իրավունքների պաշտպանությունը, ժողովրդավարությունը և օրենքի գերակայությունը: ՀՀ-ն կարևոր անդամ-պետություն է Եվրոպայի խորհրդի համար, և ԵԽ-ն կարևոր կազմակերպություն է Հայաստանի համար: Սա առաջին անգամ է, երբ մենք էսսեների նման մրցույթ ենք կազմակերպում, բայց վերջինը չի լինի»,- ասաց Վուտովան:
Էսսեների մրցույթին մասնակցել է 20 աշակերտ՝ Հայաստանի բոլոր ավագ դպրոցներից: Լավագույն աշխատանքներն ընտրել է տարբեր բարձրագույն ուսումնական հաստատությունների մասնագետներից և ՀՀ կրթության, գիտության, մշակույթի և սպորտի նախարարության աշխատակիցներից կազմված ժյուրին: ԿԳՄՍ նախարարի խորհրդական Գոհար Մամիկոնյանը նշեց, որ իրենց կողմից մրցույթի մասին տեղեկանքն ուղարկվել է բոլոր ավագ դպրոցներին, և ընտրվել են լավագույն աշխատանքները:
«20 աշակերտներ են մասնակցել մրցույթին և ուղարկել իրենց պատկերացումները «Ապագա եվրոպացին» թեմայի շուրջ: Նախ և առաջ, մեծ ուշադրություն է դարձվել հայերենին, կառուցվածքին, ընդհանուր բովանդակությանը և երեխաների պատկերացումներին»,- նշեց նախարարի խորհրդականը:
Մրցույթում 2-րդ և 3-րդ տեղերը զբաղեցրած մասնակիցները պատվոգրեր և նվերներ ստացան Եվրոպայի խորհրդի կողմից: