1 րոպեի ընթերցում
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: ՀՀ մարզերում կրթություն ստանալու հնարավորության պարագայում նախապատվությունը տրվում է տղաներին:
«Արմենպրես»-ի հաղորդմամբ՝ այս մասին ասաց ՀՀ աշխատանքի և սոցիալական հարցերի փոխնախարար Ժաննա Անդրեասյանը՝ ամփոփելով 10 մարզային այցելությունների արդյունքները:
Նրա խոսքով՝ ՀՀ մարզերում կրթական ոլորտում մի շարք խնդիրներ կան՝ սկսած աղջիկ երեխաների սեռադաստիարակությունից, մինչև գյուղաբնակ աղջիկների մասնագիտական կրթություն ստանալը:
«Կրթություն ստանալու ժամանակ, ինչպես աշխատանքի ընդունման հարցում նախապատվությունը տալիս են տղային՝ այսպիսով, խտրականություն դնելով աղջկա և տղայի միջև: Հայաստանի շատ դպրոցներում բացակայում են գենդերազգայուն դասագրքերն ու կրթական միջավայրը»,- նշեց Անդրեասյանը:
Նա ընդգծեց, որ որոշ մարզերում բացակայում կամ սահմանափակ են մասնագիտական ուսումնական հաստատությունների հնարավորությունները:
Նա մտահոգիչ համարեց նաև եզդի աղջիկների կրթության իրավունքի հարցը, որն, իսկապես, լուրջ խնդիրներից է: