Թուրքիայում Ալի Բաբաջանի հիմնադրելիք կուսակցությունը կունենա 4 ուղղվածություն

ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ: Թուրքիայի նախկին փոխվարչապետ, էկոնոմիկայի նախարար Ալի Բաբաջանը իշխող «Արդարություն և զարգացում» կուսակցությունից հեռանալուց հետո սեղմեց նոր կուսակցություն հիմնելու կոճակը:

Այս մասին, ինչպես հաղորդում է «Արմենպրես»-ը, տեղեկացնում է թուրքական «Սյոզջու»-ն:

Տեղեկությունների համաձայն՝ նոր կուսակցության հիմնադրման հետ կապված հիմնական աշխատանքները կատարվելու են մինչև հոկտեմբեր: Նախատեսվում է, որ կուսակցության հիմնադիրները կիրառելու են Թուրքիայի 19-րդ վարչապետ և 8-րդ նախագահ Թուրգութ Օզալի հիմնած «Մայր հայրենիք» կուսակցության մոդելը: Ինչից կարելի է ենթադրել, որ կուսակցությունը կունենա միանգամից 4 ուղղվածություն՝ լիբերալ, սոցիալ-դեմոկրատական, պահպանողական և ազգայնական:

Ալի Բաբաջանը հայտնել է, որ կուսակցության հիմնական նպատակը խորհրդարանում խմբակցություն ստեղծելը չէ, ուստի պատգամավորների հետ կապված ԱԶԿ-ի հետ բանակցությունների մեջ չի մտնելու: Սակայն, միևնույն ժամանակ նոր կուսակցության դռները միշտ բաց կլինեն ԱԶԿ-ից դժգոհ պատգամավորների համար:

Խորհրդարանում խմբակցություն ունենալու համար անհրաժեշտ կլինի, որ 20 պատգամավոր անցնի իրենց կողմը: Չնայած որ ԱԶԿ ղեկավարները հավանական չեն համարում դա, այնուամենայնիվ, պատրաստվում են, ներքին կանոնադրության փոփոխություններ իրականացնելով, խորհրդարանում խմբակցություն ստեղծելու համար անհրաժեշտ պատգամավորների թիվը 20-ից հասցնել 30-ի:

Ալի Բաբաջանը հուլիսի 8-ին հայտնել է «Արդարություն և զարգացում» կուսակցությունից հեռանալու մասին: Նա համարվում է 2001թ. հիմնված «Արդարություն և զարգացում» կուսակցության համահիմնադիրներից մեկը: Նախատեսվում է, որ Բաբաջանը Թուրքիայի 11-րդ նախագահ Աբդուլլահ Գյուլի հետ աշնանը նոր կուսակցություն է հիմնելու: