Աննա Հակոբյանը դստեր հետ մասնակցել է Քաղցրավենիքի փառատոնին

ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ: ՀՀ վարչապետի տիկին, «Իմ քայլը» և «City of smile ժպիտների քաղաք» բարեգործական հիմնադրամների հոգաբարձուների խորհրդի նախագահ Աննա Հակոբյանը դստեր` Արփի Փաշինյանի հետ հունիսի 22-ին այցելել է Երևանի Հյուսիսային պողոտայում բացված Քաղցրավենիքի փառատոնին:

Ինչպես «Արմենպրես»-ին տեղեկացրին ՀՀ վարչապետի տիկնոջ գրասենյակից, Աննա Հակոբյանը դստեր հետ շրջել է տաղավարներով, կատարել գնումներ, շփվել և լուսանկարվել փառատոնի մասնակիցների և անցորդների հետ:

Քաղցրավենիքի փառատոնի կազմակերպիչը «Խաղաղության քաղաք» հասարակական կազմակերպությունն է: Կազմակերպությունն արդեն մի քանի տարի է իրականացնում է տարբեր հիվանդություններ ունեցող երեխաների երազանքներն ու այս փառատոնի հասույթի մի մասն էլ ուղղվելու է այդ նպատակին: Այս տարի փառատոնին մասնակցում է 30 տաղավար: