3 րոպեի ընթերցում
ԵՐԵՎԱՆ, 21 ՄԱՐՏԻ, ԱՐՄԵՆՊՐԵՍ: Հայաստանի Հանրապետության արդարադատության նախարար Արտակ Զեյնալյանը մարտի 20-ին մասնակցել է Արդարադատության ակադեմիայի պրոռեկտոր, ի.գ.թ., ԵՊՀ սահմանադրական իրավունքի դոցենտ Անահիտ Մանասյանի «Սահմանադրական կայունությունը՝ որպես կայուն ժողովրդավարության կարևորագույն գրավական» մենագրության շնորհանդեսին:
Ինչպես «Արմենպրես»-ին տեղեկացրին ՀՀ արդարադատության նախարարության տեղեկատվության և հասարակայնության հետ կապերի վարչությունից, նախարար Զեյնալյանը շնորհակալություն է հայտնել հեղինակին հրավերի համար և նշել, որ ժամանակակից քաղաքակրթության մարտահրավերներից մեկը կայուն ժողովրդավարության և դրա հենքի վրա ստեղծված իրավական պետության գոյության ապահովումն է, իսկ կայուն ժողովրդավարության հաստատուն հիմքերից մեկը սահմանադրական կայունությունն է:
«Կարևորելով այս երկու ինստիտուտների նկատմամբ ոչ միայն քաղաքական, այլև ակադեմիական հետաքրքրությունը՝ ընդգծեմ, որ Հայաստանում սահմանադրական կայունության ականատեսը եղանք մենք բոլորս անցյալ տարի տեղի ունեցած թավշյա, ոչ բռնի հեղափոխության ընթացքում: Առաջին անգամ ժամանակակից քաղաքակրթության պատմության մեջ հեղափոխությունը և դրան հաջորդող ընտրական և այլ գործընթացները տեղի ունեցան գործող սահմանադրության շրջանակում, իրավական ճանապարհով՝ խուսափելով որևէ իրավական կամ սահմանադրական ճգնաժամից կամ ցնցումից»,- նշել է Արտակ Զեյնալյանը՝ հավելելով, որ այն շարունակական է լինելու:
Խոսելով իրավական անվտանգությունից և կայուն ժողովրդավարությունից՝ նախարարն ընդգծել է, որ դրանք Կառավարության կողմից իրականացվող քաղաքական գործընթացի ողնաշարն են: Այդ համատեքստում Արտակ Զեյնալյանը կարևորել է այն փաստը, որ մենագրության մեջ համակողմանի հետազոտվել են սահմանադրական մարմինների միջև իրենց սահմանադրական լիազորությունների առնչությամբ վեճերի հաղթահարման իրավական կառուցակարգերը, ներկայացվել է այդ վեճերի բովանդակության, դրանց լուծման առանձնահատկությունների առնչությամբ հայեցակարգային մոտեցում և այլն:
«Ժողովրդավարությունը, ժողովրդաիշխանությունը կարծրացած երևույթներ չեն, դրանց զարգացումները ներկայում հանգեցրել են ժողովրդավարության ու ժողովրդաիշխանության դոկտրինի վերաիմաստավորման, ժողովրդի իշխանության սահմանների հստակեցման, անմիջական և միջնորդավորված ժողովրդաիշխանության կառուցակարգերի համադրման անհրաժեշտության և այս ոլորտներում իրավունքի, քաղաքականության և գիտության մարտահրավերները բազմաթիվ են»- ամփոփելով խոսքը՝ նշել է Արտակ Զեյնալյանը:
Մենագրության շնորհանդեսին մասնակցել են նաև ԵՊՀ իրավագիտության ֆակուլտետի դեկան Գագիկ Ղազինյանը, Բարձրագույն դատական խորհրդի անդամ Գևորգ Դանիելյանը, իրավաբանական համայնքի այլ ներկայացուցիչներ: