Հայաստանն ու Բուլղարիան ամրապնդում են տնտեսական կապերը. կայացավ միջկառավարական հանձնաժողովի նիստը

ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: Հայաստանի և Բուլղարիայի Հանրապետությունների կառավարությունների միջև երկարաժամկետ և տնտեսապես փոխշահավետ համագործակցության հաստատումն ու ընդլայնումը կնպաստեն երկու երկրի ժողովուրդների բարեկեցությանը:

«Արմենպրես»-ի հաղորդմամբ` կայացավ առևտրատնտեսական և գիտատեխնիկական համագործակցության հարցերով հայ-բուլղարական միջկառավարական հանձնաժողովի 8-րդ նիստը:

Հանձնաժողովի հայկական կողմի նախագահ Հայաստանի Հանրապետության տրանսպորտի, կապի և տեղեկատվական տեխնոլոգիաների նախարար Հակոբ Արշակյանն արձանագրեց, որ վերջին տարիներին, չնայած երկու երկրների միջև հարաբերությունների բարձր մակարդակին, առևտրատնտեսական համագործակցության զարգացումն ընթանում է ոչ կայուն ռիթմով:

«Երկկողմ առևտրային ցուցանիշները բավականին ցածր են: Բուլղարիան՝ հանդիսանալով Եվրոպական Միության մաս՝ Հայաստանի համար հուսալի և կանխատեսելի գործընկեր է, որի հետ տնտեսական կապերը մեծ նշանակություն են ունեցել մեր երկրի համար»,- ասաց Արշակյանը:

Նախարար Արշակյանը նշեց, որ երկկողմ առևտրային և ներդրումային հարաբերութունների ներկա մակարդակը ամբողջովին չի արտացոլում երկու երկրների տնտեսական ողջ ներուժը:

«Երկու երկրների գործարարների և գործարար ասոցիացիաների միջև կապերի ամրապնդումը կարող է մեծապես նպաստել բոլոր բնագավառներում հայ-բուլղարական հարաբերությունների արդյունավետ զարգացմանը: Պետք է օգտագործել բոլոր այն հարթակները, որոնք կարող են նպաստել Բուլղարիայի և Հայաստանի առևտրատնտեսական հարաբերությունների ամրապնդմանը: Այս հանձնաժողովի նիստի նպատակն է նպաստել երկու երկրների կառավարությունների միջև երկարաժամկետ և տնտեսապես փոխշահավետ համագործակցության հաստատմանն ու ընդլայնմանը` ի շահ մեր ժողովուրդների բարեկեցության»,- շեշտեց Հակոբ Արշակյանը։

Նրա խոսքով՝ իրենք քայլեր են իրականացնում ենթակառուցվածքների բարելավման և առկա հնարավորությունների լիարժեք օգտագործման ուղղությամբ, ինչը թույլ կտա իջեցնել տրանսպորտային բաղադրիչի արժեքը:

«Հայաստանը կարևորում է ազատ տնտեսական գոտիների ստեղծումը, որպես ուղղակի օտարերկրյա ներդրումների ներգրավման, առաջադեմ տեխնոլոգիաների ներդրման և նորարարական մոտեցումների կիրառման, ինչպես նաև նոր աշխատատեղերի ստեղծման մեծ խթան»,- ասաց ՀՀ ՏԿՏՏ նախարարը և հավելեց, որ գյուղատնտեսության, անասնաբուժության և սննդամթերքի անվտանգության բնագավառներում, զբոսաշրջության ոլորտում ակտիվ համագործակցություն է ընթանում Բուլղարիայի հետ:

Միջկառավարական հանձնաժողովի նիստի ժամանակ քննարկվեցին նաև կրթությանը և գիտությանը, մշակույթին, շրջակա միջավայրի պաշտպանությանը, ռազմատեխնիկական համագործակցությանը, քաղաքաշինությանը և արտակարգ իրավիճակներին վերաբերող հարցեր:

Դիմելով Բուլղարիայի Հանրապետության տրանսպորտի, տեղեկատվական տեխնոլոգիաների և հաղորդակցության նախարար Ռոսեն Ժելյազկովին, Արշակյանն ընդգծեց, որ Հայաստանի կառավարությունը մեծ ուշադրություն է դարձնում ենթակառուցվածքների զարգացմանը:

«Այժմ իրականացվում է Հայաստանի Հանրապետության «Հյուսիս-Հարավ ճանապարհային միջանցք» ծրագիրը, որը խոշոր ենթակառուցվածքային ծրագիր է: Ծրագրի նպատակն է միջազգային բարձր չափանիշներին համապատասխանող ավտոմայրուղով երկրի հարավը կապել հյուսիսի հետ: Ծրագրի իրականացման արդյունքում ուղիղ կապ է ստեղծվում Բուլղարիայի Հանրապետության և Հայաստանի Հանրապետության միջև՝ սկիզբ առնելով Սև ծովի նավահանգիստներից, անցնելով Վրաստանի, Հայաստանի, Իրանի միջով, հասնելով ընդհուպ մինչև Պարսից ծոց: Լայն հնարավորություն է ընձեռվում խորացնելու համագործակցությունը մեր երկու երկրների միջև բեռնափոխադրումների և ուղևորափոխադրումների բնագավառում»,- ասաց Արշակյանը:

Հայաստանի կառավարությունը իր պատրաստակամությունն է հայտնում համագործակցելու Բուլղարիայի Հանրապետության հետ` թվային տնտեսությունների ներդաշնակեցման ու ինտեգրման ուղղությամբ:

Միջկառավարական հանձնաժողովի Բուլղարական կողմի նախագահ, Բուլղարիայի Հանրապետության տրանսպորտի, տեղեկատվական տեխնոլոգիաների և հաղորդակցության նախարար Ռոսեն Ժելյազկովն ասաց, որ երկու երկրների միջև առևտրաշրջանառությունը ցածր է:

«Մենք նախատեսում ենք ավելի խորացնել ներդրումային համագործակցությունը և առևտրաշրջանառությունը: Այս ամենի երաշխիքը հանդիսանում է ներդրումային լավ միջավայրը, որը առկա է Հայաստանում, ինչպես նաև Բուլղարիայում առկա բարենպաստ ներդրումային մթնոլորտը»,- շեշտեց Ժելյազկովը:

Նա ընդգծեց, որ հաջորդ հանձնաժողովի նիստն անցկացվելու է 2021 թվականի սկզբին և հույս հայտնեց, որ մինչև այդ բոլոր ոլորտներում ընդլայնված կլինեն պարամետրերը:

«Մերձավորարևելյան երկրներ ապրանքների արտահանման համար Հայաստանը կարևոր միջանցք է հանդիսանում Բուլղարիայի համար: Մենք հույս ունենք համագործակցել երկկողմ հետաքրքրությունների և վստահության հիման վրա»,- եզրափակեց բուլղարացի նախարարը:

Հայաստանի և Բուլղարիայի Հանրապետությունների միջև 2018 թվականին արտաքին առևտրաշրջանառությունը կազմել է 259 մլն ԱՄՆ դոլար, որը 2017 թվականի համեմատ կրճատվել է 19.6 տոկոսով: Հայաստանից Բուլղարիա արտահանումը 2018 թվականին կազմել է 215.3 մլն ԱՄՆ դոլար, որը նախորդ տարիների համեմատ կրճատվել է 23.8 տոկոսով, իսկ Բուլղարիայից Հայաստան ներմուծումը ըստ ապրանքի ծագման երկրի կազմել է 43.8 մլն ԱՄՆ դոլար և աճել է 9.5 տոկոսով: Առևտրային դրական բալանսը կազմել է 171.5 մլն ԱՄՆ դոլար:

Նիստի ավարտին արդյունքների վերաբերյալ ստորագրվեցին արձանագրություններ: