Հանրապետությունում այսուհետ կգործի մանկական արյունաբանության և ուռուցքաբանության մեկ միասնական կլինիկա
2 րոպեի ընթերցում
ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: Պրոֆեսոր Յոլյանի անվան արյունաբանական կենտրոնի և ԵՊԲՀ Մուրացան հիվանդանոցային համալիրի մանկական ուռուցքաբանական և արյունաբանական ծառայությունների միավորման արդյունքում Հանրապետությունում այսուհետ գործելու է մանկական արյունաբանության և ուռուցքաբանության մեկ միասնական կլինիկա։ Այն տեղակայված կլինի պրոֆեսոր Յոլյանի անվան արյունաբանական կենտրոնում:
«Արմենպրես»-ի հաղորդմամբ՝ լրագրողների հետ զրույցում այս մասին ասաց Արյունաբանական կենտրոնի տնօրեն Սամվել Դանիելյանը: Նրա խոսքով՝ նման մտադրություն ժամանակին եղել է, սակայն ինչ-ինչ պատճառներով հետաձգվել է:
«Արյունաբանական կենտրոնի և ԵՊԲՀ Մուրացան հիվանդանոցային համալիրի մանկական ուռուցքաբանական և արյունաբանական ծառայությունների միավորումը հնարավորություն կտա կենտրոնացնել մեր միջազգային կապերն այս ոլորտում», -ասաց Դանիելյանը՝ հավելելով, որ այսօր քաղցկեղով և արյան հիվանդություններով 10 երեխաներից 7-ը կատարյալ բուժվելու հնարավորություն ունի:
Միջոցառմանը ներկա ՀՀ վարչապետի տիկին, «Սիթի օֆ սմայլ» բարեգործական հիմնադրամի հոգաբարձուների խորհրդի նախագահ Աննա Հակոբյանը շրջեց կենտրոնով, ծանոթացավ պայմաններին:
Կենտրոնի բացման արարողությանը ներկա էին բարձրաստիճան պաշտոնյաներ, բժիշկներ եւ հասարակական գործիչներ, ինչպես նաեւ ԵՊԲՀ-ում տեղի ունեցող Մանկական ուռուցքաբանության միջազգային կոնգրեսի մասնակիցները։