Միացյալ Թագավորությունը վավերացրել է ՀՀ-ԵՄ Համապարփակ և ընդլայնված գործընկերության համաձայնագիրը /լրացված/

ԵՐԵՎԱՆ, 21 ՀՈՒՆՎԱՐԻ, ԱՐՄԵՆՊՐԵՍ: Միացյալ Թագավորությունը հունվարի 18-ին վավերացրել է Հայաստան-Եվրամիություն Համապարփակ և ընդլայնված գործընկերության համաձայնագիրը: «Արմենպրես»-ի հաղորդմամբ՝ այս մասին տեղեկացնում է ՀՀ-ում ՄԹ դեսպան Ջուդիթ Ֆարնուորթը:

«Ուրախությամբ հայտարարում եմ, որ Միացյալ Թագավորությունը վավերացրել է Հայաստան-Եվրամիություն Համապարփակ և ընդլայնված գործընկերության համաձայնագիրը»,-գրել է դեսպանը «Թվիթեր» սոցիալական ցանցի իր միկրոբլոգում:

ՀՀ-ԵՄ Համապարփակ և ընդլայնված գործընկերության համաձայնագիրը ստորագրվել է Բրյուսելում 2017թ. նոյեմբերի 24-ին: Այն վավերացրել է 10 պետություն՝ Հայաստան, Բուլղարիա, Դանիա, Էստոնիա, ՄԹ, Լիտվա, Լատվիա, Լյուքսեմբուրգ, Մալթա, Լեհաստան:

ՄԹ-ում ՀՀ դեսպանությունը տեղեկացնում է. «Այսօր ՄԹ Արտաքին գործերի նախարարությունը Լոնդոնում ՀՀ դեսպանությանը տեղեկացրել է ՄԹ-ում ՀՀ-ԵՄ Համապարփակ և ընդլայնված համաձայնագրի վավերացման գործընթացի ավարտի մասին։ ՄԹ-ում վավերացման գործընթացը մեկնարկել էր անցյալ տարի Համայնքների և Լորդերի պալատների կողմից համաձայնագրի հաստատմամբ։ Դրան հաջորդեցին մնացած ներպետական ընթացակարգերը, որով ավարտվեց վավերացման գործընթացը։ Այդ մասին ծանուցվել է Եվրոպական միությունը»։