Կկառուցվի տարածաշրջանային աղբավայր, և կփակվեն Աջափնյակի ու Նուբարաշենի գործող աղբավայրերը

ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարությունը հավանություն տվեց «Հայաստանի Հանրապետության և Վերակառուցման և զարգացման Եվրոպական բանկի միջև 2015 թվականի դեկտեմբերի 11-ին ստորագրված «Երևանի կոշտ թափոնների կառավարման ծրագիր» վարկային համաձայնագրի ժամկետը երկարաձգելու մասին» նամակ-համաձայնագրի ստորագրման առաջարկությանը:

«Արմենպրես»-ի հաղորդմամբ, Տարածքային կառավարման և զարգացման նախարարի պաշտոնակատար Սուրեն Պապիկյանը նշեց, որ ծրագրով նախատեսվում է Նուբարաշենում կառուցել տարածաշրջանային աղբավայր և փակել Աջափնյակի ու Նուբարաշենի գործող աղբավայրերը:

Ծրագրի արժեքը կազմում է 26 մլն եվրո, որից վարկային բաղադրիչը կազմում է 16 լն, իսկ տրամադրվող դրամաշնորհները՝ 8 մլն ԵՄ հարևանության ներդրումային գործիքի միջոցով և 2 մլն Եվրոպական բանկի կողմից: Պապիկյանն ասաց, որ առ այսօր ծրագրի շրջանակներում գումարներ չեն ներգրավել: Կապալառուի ընտրության հարցը, ըստ նրա, նախատեսվում է 6 ամսից, մեկ տարի ըստ կանոնակարգման: Վարչապետի պաշտոնակատար Նիկոլ Փաշինյանը հետաքրքրվեց՝ իրենց խնդիրը աղբավայրը փակե՞լն է, թե՞ աղբի վերամշակման գործարան կառուցելը:

Պապիկյանը նշեց, որ 30-40-50 տարվա պատմություն ունեցող աղբավայր է, այն հետաքրքիր չէ պոտենցիալ ներդրողի համար, շահույթ ստանալն անհնարին է, և հավելյալ գումարներ պետք է ներգրավել՝վերամշակող ներգրավելու համար: Ըստ նրա՝ ներդրողներին հետաքրքիր է որակյալ աղբը: Փոխվարչապետ Մհեր Գրիգորյանը նշեց, որ մաքսիմալ արագ պետք է անել այս ծրագիրը, քանի որ շատ է հետաձգվել: