Հացադուլի պատճառով տասնյակ քրդամետ գործիչներ են ձերբակալվել Թուրքիայում 

ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Ուրֆա քաղաքում հացադուլ իրականացնելու պատճառով ձերբակալվել է Թուրքիայի քրդամետ Ժողովուրդների դեմոկրատական կուսակցության (HDP) 38 ներկայացուցիչ:

Այս մասին, ինչպես հաղորդում է «Արմենպրես»-ը, հայտնում է թուրքական demokrathaber-ը:

Ձերբակալության պատճառը եղել է կուսակցության ներկայացուցիչների կողմից ի աջակցություն բանտարկված քուրդ պատգամավոր Լեյկա Գյուվենի իրականացրած 3 օրյա հացադուլը:

Ոստիկանությունը նաև խուզարկություն է իրականացրել կուսակցության Ուրֆայի մասնաճյուղում:

Քրդամետ ժողովուրդների դեմոկրատական կուսակցության (HDP) ներկայացուցիչների հացադուլը որակվել է որպես «ահաբեկչության քարոզչություն»:

Թուրքիայում գործող քրդամետ Ժողովուրդների դեմոկրատական կուսակցությունը համարվում է 1978 թ. Աբդուլլահ Օջալանի կողմից հիմնադրված «Քրդստանի աշխատավորական կուսակցության»-ը (PKK) սատարող ուժ:

PKK-ն արգելված է Թուրքիայում և համարվում է ահաբեկչական խմբավորում:

Քրդստանի աշխատավորական կուսակցությունը պաշտպանում է Թուրքիայի քրդերի շահերն ու իրավունքները և ռազմական գործողությունների միջոցով փորձում է ստիպել թուրքական իշխանություններին լուծել քրդական խնդիրը:

1980-ականներից PKK-ի սկսած պայքարի արդյունքում Թուրքիայի զինված ուժերի հետ բախումներում զոհվել է մոտ 50 հազար մարդ, իսկ Թուրքիայի տնտեսությունը տասնյակ միլիարդ դոլարների վնաս է կրել: