ՀՀ փոխվարչապետի պաշտոնակատար Տիգրան Ավինյանը «Արմպրոդէքսպո 2018» մասնագիտացված ցուցահանդեսը համարում է ստացված
2 րոպեի ընթերցում
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: ՀՀ փոխվարչապետի պաշտոնակատար Տիգրան Ավինյանը «Արմպրոդէքսպո 2018» մասնագիտացված ցուցահանդեսը ստացված է համարում: «Արմենպրես»-ի հաղորդմամբ՝ լրագրողների հետ զրույցում Ավինյանը ողջունելի համարեց այն հանգամանքը, որ ցուցահանդեսում ներկայացված ընկերությունների կարողությունները գնալով զարգանում են: «Ընկերությունները, որոնք ներկայացված են այս տարվա ցուցահանդեսում, բավականին կայացած են: Կային փոքր և միջին ձեռնարկություններ, որոնք ունեին հսկայական պոտենցիալ: Մեր կառավարության ամենակարևոր քայլերից մեկը պետք է լինի նման ընկերությունների պոտենցիալը զարգացնելը»,-նշեց նա:
«Արմպրոդէքսպո 2018» ցուցահանդեսին մասնակցում են ավելի քան 70 կազմակերպություններ Հայաստանից, Արցախից, ինչպես նաև Իտալիայից, Ռուսաստանից և Իրանից։
Ցուցահանդեսը կազմակերպվում է 2001 թվականից, նպատակն է ներկայացնել գյուղատնտեսական արտադրության, գյուղատնտեսական հումք վերամշակող արդյունաբերության հնարավորությունները, գնահատել սեփական արտադրանքի մրցունակությունը, ընդլայնել արտահանման հնարավորությունները, հաստատել գործարար կապեր, այցելուներին ու հյուրերին ցուցադրել գյուղատնտեսական և պարենային բարձրորակ ապրանքատեսականի։
«Արմպրոդէքսպոն» կտևի մինչև նոյեմբերի 4-ը ներառյալ և բաց կլինի ամեն օր ժամը 10։00-ից մինչև 18:00-ն: