2 րոպեի ընթերցում
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ բնապահպանության նախարարությունը Սևանա լճի համար կարևոր նշանակություն ունեցող էնդեմիկ կողակ ձկնատեսակի վերականգնման նպատակով նախատեսում է դրա արհեստական վերարտադրության աշխատանքներ:
«Արմենպրես»-ի հաղորդմամբ`ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի կազմակերպած «Սևանա լճի հիմնախնդիրները» թեմայով խորհրդարանական լսումներին այս մասին ասացՀՀ բնապահպանության նախարար Էրիկ Գրիգորյանը:
«Ոչ այնքան շատ շրջանառվող հարց է Սևանա լճի կենսաբազմազանության հարցը: Էնդեմիկ ձկնատեսակների և թռչունների բնակատեղի էր այն: Կողակի վերարտադրման ծրագրի համար նախնական հետազոտություններ ենք իրականացնում: Կողակը ոչ միայն էնդեմիկ է, այլև միակն է, որն սնվում է օրգանական նյութերով՝ դրանով սանիտարի դեր կատարելով լճի էկոհամակարգի համար»,-ասաց Գրիգորյանն ու հավելեց` նախարարությունը նախատեսում է կազմակերպել կողակի արհեստական վերարտադրման աշխատանքներ:
Նախարարը նկատեց` աֆրիկյան և եվրասիական թռչունների մի մեծ մասը միգրացիայի ժամանակ օգտվում է Սևանա լճի հնարավորություններից: Կենսաբազմազանության տեսակետից Սևանա լիճը շատ կարևոր վայր է համարվում: 2002թ. հետո լճի մակարդակի բարձրացման արդյունքում զգալի քանակությամբ թռչուններ վերադարձել են, մասնավորապես՝ մեծ ձկնկուլը: Նախարարը դա կենսաբազմազանության տեսակետից շատ կարևորեց: