Իսպանիան մեկ գնդակի առավելությամբ հաղթեց Իրանին. B խումբ
2 րոպեի ընթերցում
![Իսպանիան մեկ գնդակի առավելությամբ հաղթեց Իրանին. B խումբ](http://armenpress.am/resized/480/static/news/b/2018/06/938300.jpg)
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Ֆուտբոլի աշխարհի առաջնության B խմբի երկրորդ տուրում Իրանի հավաքականը մրցեց Իսպանիայի ընտրանու դեմ:
«Արմենպրես»-ի հաղորդմամբ՝ Կազան քաղաքի համանուն մարզադաշտում կայացած մեկնարկային րոպեներին Իսպանիայի թիմը շատ ակտիվ սկսեց: Սակայն խաղակեսի ընթացքում Իրանի հավաքականը հավասարեցրեց խաղը և երբեմն ստիպում էր իսպանացիներին լուրջ անհանգստանալ:
Երկրորդ կեսի 54-րդ րոպեին «կարմիր ֆուրիան» առաջ անցավ հաշվի մեջ: Իսպանացիներին առաջ մղեց Դիեգո Կոստան, ով իր 10-րդ գնդակը խփեց Իսպանիայի հավաքականի կազմում: Իրանի հավաքականի հակագրոհներից մեկի ժամանակ կարողացավ գրավել եվրոպացիների դարպասը, սակայն մրցավարը դարպասի գրավում չարձանագրեց, քանի որ գոլը խփվել էր խաղից դուրս իրավիճակից:
Իրանի հավաքականը 82-րդ րոպեին շատ մոտ էր վերականգնելու հաշվի հավասարությունը, սակայն իրանցի ֆուտբոլիստի հարվածը շատ բարձր ստացվեց: Ի վերջո իսպանացիները պահպանեցին նվազագույն առավելությունը և հաղթեցին 0:1 հաշվով:
Իսպանիայի ազգային թիմը խմբային փուլի վերջին խաղը կանցկացնի հունիսի 25-ին և կմրցի Մարոկկոյի ընտրանու հետ: Իրանի թիմը կխաղա Պորտուգալիայի հավաքականի հետ:
Այս տուրից հետո B խմբի առաջատարները Իսպանիայի և Պորտուգալիայի հավաքականներն են, որոնք ունեն 4-ական միավոր: Իրանն ունի 3 միավոր, իսկ Մարոկկոն միավոր չունի:
Մունդիալի մասին այլ նյութերայստեղ:
Լուսանկարները՝ FIFA