Տիգրան Ավինյանը Չինաստանի առևտրի նախարարի հետ քննարկել է Հյուսիս-հարավ ճանապարհի շինարարությունը
2 րոպեի ընթերցում
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: Հայաստանի փոխվարչապետ Տիգրան Ավինյանն Աստանայում առանձնազրույց է ունեցել Չինաստանի առևտրի փոխնախարար Ֆու Ցզինի հետ: Ինչպես հաղորդում է «Արմենպրես»-ը, փոխվարչապետն այս մասին գրառում է կատարել «Ֆեյսբուք»-ի իր էջում:
«Ֆու Ցզինի հետ առանձնազրույցում քննարկեցինք երկկողմ տնտեսական հարաբերություններին վերաբերող հարցեր, ներառյալ՝ Հյուսիս-Հարավ ճանապարհի շինարարությունը, Հայաստան - Եվրամիություն համապարփակ և ընդլայնված գործընկերության համաձայնագիրը և դրանից բխող հնարավորությունները»,- գրել է Ավինյանը:
Նա հայտնել է նաև, որ պայմանավորվել են քննարկումները շարունակել Պեկինում կայանալիք միջկառավարական հանձնաժողովի հանդիպման շրջանակներում:
Եվրասիական տնտեսական միությունը և Չինաստանն Աստանայում առեւտրատնտեսական համագործակցության համաձայնագիր են ստորագրել:ԵԱՏՄ-ն և ՉԺՀ-ի միջև առեւտրատնտեսական համագործակցության համաձայնագրի շուրջ բանակցություններն անցկացվում Էին Եվրասիական բարձրագույն տնտեսական խորհրդի 2015 թվականի մայիսի 8-ի որոշման հիման վրա: Բանակցություններին մասնակցում Էին Եվրասիական տնտեսական հանձնաժողովի, ԵԱՏՄ-ի երկրների ազգային կառավարությունների ներկայացուցիչները, ինչպես նաև փորձագետներ և Չինաստանի գերատեսչությունների պաշտոնական ներկայացուցիչներ: