ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: Անկարան ափսոսանք Է հայտնում այն բանի կապակցությամբ, որ Ռուսաստանը վետո դրեց Սիրիայում քիմիական զենքի կիրառման հետաքննության վերաբերյալ բանաձեւի ամերիկյան նախագծի վրա: Այդ մասին, ինչպես հաղորդել Է ՌԻԱ Նովոստին, հայտարարել Է Թուրքիայի Ագ նախարարության պաշտոնական ներկայացուցիչ Համի Աքսոյը, տեղեկացնում Է «Արմենպրես»-ը:
«Չի կարելի անպատիժ թողնել քիմիական զենքի օգտագործումը: Լուրջ կասկածներ կան, որ գրոհն իրականացվել Է սիրիական ռեժիմի կողմից: Մենք ցանկանում ենք, որ դա դադարեցվի: Ափսոսանք ենք հայտնում, որ ՄԱԿ-ի Անվտանգության խորհրդում ԱՄՆ-ի առաջարկության վրա վետո դրվեց»,- հայտարարել Է Աքսոյը Անկարայում կայացած ճեպազրույցում:
Նա խուսափել Է պատասխանել ՌԻԱ Նովոստիի այն հարցին, թե Թուրքիան կպաշտպանի արդյոք ԱՄՆ-ի հնարավոր գործողությունը Սիրիայի կառավարական ուժերի դեմ: «Մենք շարունակում ենք ԱՄՆ-ի հետ շփումները: (Թուրքիայի նախագահ Թայիփ) Էրդողանը հեռախոսային բանակցություններ Է անցկացնում, մենք կշարունակենք ուշադիր հետեւել իրադարձությունների զարգացմանը»,-ասել Է Աքսոյը: Նա հավելել Է, որ ՆԱՏՕ-ի գլխավոր քարտուղար Ենս Ստոլտենբերգի՝ հաջորդ շաբաթ Անկարա կատարելիք այցի ընթացքում կքննարկվեն Թուրքիայի հարավում գտնվող «Ինջիռլիք» ավիաբազայի թեման, որտեղ բազավորված են ԱՄՆ-ի ռազմաօդային ուժերը: