Կան դեպքեր, երբ ներառական կրթություն իրականացնող հաստատություններում կրթական ծրագրերը ոչ լիարժեք են իրականացվում. ՄԻՊ

ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Մարդու իրավունքների պաշտպան Արման Թաթոյանը հաշմանդամություն ունեցող անձանց իրավունքների պաշտպանության ոլորտում մի շարք խնդիրներ է տեսնում: «Արմենպրես»-ի հաղորդմամբ, «Հաշմանդամություն ունեցող անձանց իրավունքների պաշտպանության եւ սոցիալական ներառման մասին» օրենքի նախագծի քննարկմանը, մարդու իրավունքների պաշտպանը կարեւորեց փոխադրամիջոցների մատչելիության ապահովումը: «Կրթության իրավունքի հետ կապված պետք է լիարժեք պահանջներ լինեն: Պետք է հարմարեցված լինեն շենքային պայմանները, կրթական ծրագրերը»,-ասաց նա:

Թաթոյանի խոսքով` այսօրվա դրությամբ միայն Ամերիկյան համալսարանն է հարմարեցված հաշմանդամություն ունեցող անձանց: «Ֆիզիկական մատչելիության հետ կապված չպետք է բավարարվենք միայն թեքահարթակներով: Իրականում կարեւոր է հաշվի առնել հաշմանդամության բոլոր տեսակները»,-նշեց Թաթոյանը:

Խոսելով ոլորտում առկա խնդիրներից, Մարդու իրավունքների պաշտպանն ասաց, որ կան դեպքեր, երբ ներառական կրթություն իրականացնող հաստատություններում կրթական ծրագրերը ոչ լիարժեք են իրականացվում: «Կարեւոր է կոտրել կարծրատիպերը: Անելիքներ կան նաեւ հաշմանդամության խմբերի սահմանման հետ կապված»,-հավելեց նա:

Հայաստանում ապրում է հաշմանդամություն ունեցող ավելի քան 200.000 մարդ:

«Հաշմանդամություն ունեցող անձանց իրավունքների պաշտպանության և սոցիալական ներառման մասին» օրենքի նախագծի նպատակն է ապահովել բարենպաստ պայմաններ, որպեսզի ՀՀ-ում հաշմանդամություն ունեցող անձինք, այլ անձանց հետ համահավասար հիմունքներով իրականացնեն իրենց բոլոր իրավունքներն ու ազատությունները, որոնք երաշխավորված են ՀՀ Սահմանադրությամբ եւ միջազգային պայմանագրերով:

«Հաշմանդամություն ունեցող անձանց իրավունքների պաշտպանության եւ սոցիալական ներառման մասին» օրենքի նախագծի քննարկումը նախաձեռնել է Ներառական իրավական բարեփոխումների կոալիցիան: