Ադրբեջանում նախագահական ընտրությունների ժամկետն առաջ բերելը Շավարշ Քոչարյանը կապում է ներկլանային հարաբերությունների հետ

2 րոպեի ընթերցում

ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Ադրբեջանում նախագահական ընտրությունների ժամկետն առաջ բերելու քայլը ՀՀ արտաքին գործերի նախարարի տեղակալ Շավարշ Քոչարյանը կապում է ներկլանային հարաբերությունների հետ: Այդ մասին Քոչարյանը նշեց կառավարության նիստից հետո՝ պատասխանելով հարցին, թե այդ քայլից հետո, արդյոք, սպասո՞ւմ է բանակցությունների ակտիվացում ղարաբաղյան հակամարտության շուրջ:

«Չեմ կարծում, որ Ադրբեջանն այն երկիրն է, որի համար կարևոր են ընտրությունները: Դրանց արդյունքները կանխորոշված են, գիտենք ինչպես են այնտեղ ընտրությունները կազմակերպվում, այնպես որ, ես ընտրությունների ժամկետն առաջ բերելը կկապեի իրենց ներկլանային հարաբերությունների հետ: Իհարկե, հաշվի են առնվում նաև արտաքին գործոնները, և եթե կա իշխանության համար ներքին պայքար, ապա ցանկացած տեղեկատվություն այն մասին, որ այդ ներքին պայքարում հակառակ կողմը կարող է ունենալ որոշակի աջակցություն այլ պետությունների կողմից: Բնական է, դա էլ իր ազդեցությունն է թողնում»,- «Արմենպրես»-ի փոխանցմամբ, ընդգծեց ՀՀ փոխարտգործնախարարը:

Ադրբեջանում նախագահական ընտրությունները նախատեսված էին 2018 թվականի նոյեմբերին, սակայն այդ երկրի նախագահ Իլհամ Ալիևի հրամանագրով ընտրությունները տեղափոխվել են ապրիլ ամիս:

Բաժանորդագրվեք մեր ալիքին Telegram-ում