Աքշեների գլխավորած կուսակցությունը Թուրքիայի նախագահական ընտրություններին միայնակ կմասնակցի

ԵՐԵՎԱՆ, 11 ՀՈՒՆՎԱՐԻ, ԱՐՄԵՆՊՐԵՍ: Թուրքիայում նոր հիմնված «Լավ» կուսակցության առաջնորդ Մերալ Աքշեները հայտարարել է, որ 2019 թվականի նախագահական ընտրություններին ընդառաջ մտադիր չեն համագործակցել որևէ այլ քաղաքական ուժի հետ: Ինչպես հաղորդում է «Արմենպրես»-ը, այս մասին հայտնում է թուրքական Diken պարբերականը:

«Նախագահական ընտրություններին մենք կուսակցությունից ենք թեկնածու առաջադրելու: Գործընկերներս իմ թեկնածությունն են ուզում, և ես կողմ եմ դրան»,- ասել է Աքշեները:

Նա ընդգծել է, որ թեպետ չեն ցանկանում համագործակցել որևէ այլ ուժի հետ, սակայն համագործակցության պարագայում դրանք կլինեն Ժողովրդավար կուսակցությունը և «Երջանկություն» կուսակցությունը:

Մերալ Աքշեները նախկինում եղել է «Ազգայնական շարժում» կուսակցության անդամ, զբաղեցրել է Թուրքիայի ներքին գործերի նախարարի, ինչպես նաև մեջլիսի փոխխոսնակի պաշտոնները:

Հեռանալով կուսակցությունից՝ նա հայտարարել էր նոր կուսակցություն հիմնելու մասին: Նրա քաղաքական ուժին միանալու պատրաստակամություն են հայտնել ազգայնական կուսակցության շարքերից հեռացած հարյուրավոր գործիչներ:

Ակնկալվում է, որ 2019 թվականի նախագահական ընտրություններում նա լինելու է Էրդողանի հիմնական հակառակորդը: