Էրդողանը Քըլըչդարօղլուի դեմ նոր դատական հայց կներկայացնի

ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի նախագահ Ռեջեփ Թայիփ Էրդողանը հերթական դատական հայցը կներկայացնի ընդդիմադիր Հանրապետական ժողովրդական կուսակցության առաջնորդ Քեմալ Քըլըչդարօղլուի դեմ: Պատճառը վերջինիս կողմից հրապարակած փաստաթղթերն են, որոնք ապացուցում են Էրդողանի բարեկամների ներգրավվածությունը օֆշորային գործունեությանը: Ինչպեսհաղորդում է «Արմենպրես»-ը, այս մասին հայտնում է թուրքական Diken պարբերականը:

Քըլըչդարօղլուն կուսակցության խմբակցության նիստի ժամանակ հայտարարել է, որ Էրդողանի որդին, եղբայրը, հորեղբայրն ու նրա հետ կապ ունեցող ևս մի քանի անձ 2011 թվականին 15 մլն դոլար են ուղարկել օֆշորային կազմակերպությանը: Նա ցույց էր տվել նաև իր խոսքերն ապացուցող տրանսֆերների հաղորդագրություններն ու ստացականները:

Էրդողանի փաստաբան Ահմեթ Օզելը հայտնել է, որ ընդդիմադիր գործչի ներկայացրած փաստաթղթերը պետք է ուսումնասիրվեն մասնագետների կողմից՝ պարզելու, թե արդյոք դրանք արժանահավատ նյութեր են: «Մենք Քըլըչդարօղլուից հաշիվ կպահանջենք դատարանում»,- հայտարարել է փաստաբանը: