Տրանսպորտի, կապի ոլորտում Հայաստանի և Ռուսաստանի համագործակցությունը բարձր մակարդակի վրա է. նախարար
2 րոպեի ընթերցում
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: Տրանսպորտի, կապի ոլորտում Հայաստանի և Ռուսաստանի համագործակցությունը բարձր մակարդակի վրա է: Այս մասին «Արմենպրես»-ի հետ զրույցում նշեց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը:
«Հայաստանի, Ռուսաստանի միջև, ընդհանրապես, տնտեսական համագործակցությունն է գտնվում բարձր մակարդակի վրա: Հատկապես կառանձնացնեի տրանսպորտի, կապի ոլորտը: Ինչպես գիտեք, վերջերս ՌԴ վարչապետի` Հայաստան կատարած այցի ժամանակ երկու երկրների տրանսպորտի գերատեսչությունների ղեկավարները ստորագրեցին համագործակցության համաձայնագիր: Դա ենթադրում է համատեղ աշխատանք մի շարք ուղղություններով: Մասնավորապես, հայաստանյան ավտոմեքենաների անխափան մուտքի ապահովում և անցում Ռուսաստանի տարածքով, նույնը՝ ռուսաստանյան ավտոմեքենաների համար Հայաստան մուտք գործելու դեպքում: Ինչ վերաբերում է ուղևորափոխադրումներին, ապա այն պետք է առավել կանոնակարգված դարձնել»,-ասաց նախարարը:
Անդրադառնալով դեպի Ռուսաստան և այլ ուղղություններով ոչ կանոնավոր ուղևորափոխադրումների ոլորտում առկա խնդիրներին՝ նախարարը նշեց, որ օրենսդրորեն դաշտը կարգավորված է: Այժմ վերահսկողությունն է ուժեղացվում:
«Աշխատում ենք այն ուղղությամբ, որ չթույլատրվի իրականացնել ոչ կանոնավոր ուղևորափոխադրումներ: Սահմանին տրանսպորտային տեսչությունն անցկացնում է միջոցառումներ, խախտումների դեպքում տուգանում: Մենք բնակչությանը հորդորում ենք ճանապարհորդությունը սկսել ավտոկայաններից, քանի որ այնտեղ ստուգվում է ավտոմեքենայի տեխնիկական վիճակը, կա թվային սարք, որով վերահսկվում է, թե վարորդը քանի ժամ է վարել ավտոմեքենան: Շարժվելուց առաջ վարորդները բժշկական ստուգում են անցնում, վերահսկողական աշխատանքները շարունակվում են»,-ասաց նախարարը:
Խոսելով Ռուսաստանի հետ առաջիկա փոխայցերից՝ նախարարը տեղեկացրեց, որ դեկտեմբերին նա Ռուսաստանում մասնակցելու է «Տրանսպորտային շաբաթ» միջոցառմանը: Քննարկվելու են տարածաշրջանային տրանսպորտային խնդիրները: