Պատանիների Գրան պրիի առաջատարը Կիրիլ Շևչենկոն է 

ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Ջերմուկում տեղի ունեցան Եվրոպայի պատանեկան«Գրան Պրի» շախմատային մրցաշարի 5-րդ տուրի պարտիաները:

«Արմենպրես»-ի հաղորդմամբ` տուրում գրանցվեց 3 ոչ-ոքի արդյունք: Մրցաշարի երեք առաջատարներից Կիրիլ Շևչենկոն հաղթեց Կիրիլ Շուբինին: Նշենք, որ պարտիայի ընթացքում Շուբինը ուներ մեծ առավելություն, սակայն պարտիայի վերջնամասում կոպիտ վրիպեց և պարտվեց:

Մյուս երկու առաջատարները՝ Շանթ Սարգսյանը և Արամ Հակոբյանը, իրենց պարտիաներն ավարտեցին ոչ-ոքի արդյունքով: Չորս անընդմեջ պարտությունից հետո Նորվեգիան ներկայացնող Թոր Ֆրեդրիկ Կաասենը տոնեց առաջին հաղթանակը: Մրցաշարում 3-րդ հաղթանակը տարավ Մամիկոն Ղարիբյանը: Վյաչեսլավ Զարուբիցկի – Արսենի Նեստերով պարտիան ավարտվեց հաշտությամբ:

5-րդ տուրից հետո 4.5 միավորով աղյուսակը կրկին սկսեց միանձնյա գլխավորել Ուկրաինան ներկայացնող Կիրիլ Շևչենկոն: Հայաստանի ներկայացուցիչներ Արամ Հակոբյանը և Շանթ Սարգսյանը իրենց ակտիվում ունեն 4-ական միավոր և կիսում են 2-3-րդ հորիզոնականները: Արսենի Նեստերովը 3.5 միավորով ընթանում է 4-րդ հորիզոնականում: