368.54
Արծվիկ Մինասյանը հանդիպել է «Ամառային դպրոց» ծրագրի մասնակիցների հետ
2 րոպեի ընթերցում
ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: ՀՀ բնապահապանության նախարար Արծվիկ Մինասյանն ընդունել է մայրաքաղաքի մի շարք ավագ դպրոցների աշակերտների, որոնք ամառային հանգիստը համադրելով ուսումնառության հետ` «Զարթոնք» քաղաքացիական կրթության կենտրոնի նախաձեռնությամբ միավորվել են «Ամառային դպրոց» ծրագրի շրջանակներում:
Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի բաժնից, ՀՀ բնապահպանության նախարարը ողջունել է նման ուսուցողական այցերի նախաձեռնությունը, հանգամանալից ներկայացրել ՀՀ բնապահպանության նախարարության գործառույթները, ինչպես նաև պատասխանել երիտասարդների հարցերին, որոնք վերաբերել են թե նախարարության կողմից իրականացվող աշխատանքներին, թե անձնապես՝ նախարարին: Հարցերի շրջանակը բավականին լայն է եղել, երիտասարդները հարցեր են ուղղել «Կանաչ էկոնոմիկա» ծրագրի, Երևանի բուսաբանական այգու, ոլորտում իրականացվող բարեփոխումների, էկոկրթության և մի շարք այլ հարցերի վերաբերյալ: Ներկայացնելով քաղաքացիական հասարակության հետ նախարարության աշխատանքը Արծվիկ Մինասյանը հորդորել է լինել պատասխանատու քաղաքացի, սիրել բնությունն ու հայկական յուրօրինակ բնաշխարհը: Անդրադառնալով պատանիների նախարարության հետ համատեղ աշխատանքի հնարավորությանը՝ նախարարն առաջարկել է մասնակցություն ունենալ Գոշ լճի շրջակայքում օգոստոսի 5-ին նախատեղվող շաբաթօրյակին, ինչին աշակերտները արձագանքել են մեծ ոգևորությամբ:
Բաժանորդագրվեք մեր ալիքին Telegram-ում