2 րոպեի ընթերցում
ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ: Սերբիան մտադիր է նոր նախաձեռնություն սկսել, որը ենթադրում է վերացնել վիզային ռեժիմը սովորական անձնագիր ունեցող Հայաստանի, Վրաստանի և Ադրբեջանի քաղաքացիների համար: Ինչպես հաղորդում է «Արմենպրես»-ը` վկայակոչելով սերբական b92.net լրատվամիջոցը, հարցը քննարկվել է դեկտեմբերի 27-ին Բելգրադում:
Հանդիպմանը մասնակցել են առաջին փոխվարչապետ և արտաքին գործերի նախարար Իվիցա Դաչիչը, փոխվարչապետ և ներքին գործերի նախարար Նեբոյշա Ստեֆանովիչը, փոխվարչապետ և առևտրի, զբոսաշրջության ու հեռահաղորդակցության նախարար Ռասիմ Յայիչը:
Սերբիայի արտաքին գործերի նախարարությունը, խոսելով երկրի վիզային քաղաքականության մասին, հայտնել է, որ Սերբիայի անձնագիր ունեցող անձինք ներկայում կարող են 64 երկիր այցելել առանց մուտքի արտոնագրի: Համաձայնություն է կայացվել շարունակել վիզային ռեժիմի դյուրացման քաղաքականությունը հնարավորինս շատ երկրների հետ` բարելավելու երկկողմ քաղաքական հարաբերությունները, ներգրավելու արտասահմանյան ներդրումներ և ինտենսիվացնելու տնտեսական և զբոսաշրջային համագործակցությունը:
Այս առթիվ որոշում է կայացվել նախաձեռնել գործընթաց, որի արդյունքում կվերացվի վիզաների անհրաժեշտությունը սովորական անձնագիր կրող Հայաստանի, Վրաստանի և Ադրբեջանի քաղաքացիների համար: Հանդիպման ժամանակ որոշում է կայացվել նաև երկրների որոշակի խմբի դեպքում վերացնել մուտքի արտոնագիրը դիվանագիտական և պաշտոնական անձնագրերի համար: