«Արմենպրես»-ն ու Վրաստանի GHN լրատվական գործակալությունը համագործակցությունը նոր մակարդակի են բարձրացնում
3 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի «Արմենպրես» պետական լրատվական գործակալությունն ու Վրաստանի GHN լրատվական գործակալությունները համագործակցությունը նոր մակարդակի են բարձրացնում: «Արմենպրես» լրատվական գործակալության տնօրեն Արամ Անանյանն ընդունել է GHN լրատվական գործակալության ղեկավար, գլխավոր խմբագիր Թեյմուրազ Չումբուրիձեի գլխավորած պատվիրակությանը: Լրատվական գործակալությունների ղեկավարները քննարկել են երկկողմ համագործակցության օրակարգը, որն, ըստ Արամ Անանյանի, բավական հարուստ է:
«Նախանշել ենք առաջիկա անելիքները, ծրագրերը, քննարկել ենք լրատվական դաշտում միմյանց փորձը: Մենք ներկայացրեցինք սոցիալական ցանցերում ունեցած մեր փորձը, լրատվական պրոդուկտների ձևավորման հետ կապված հարցեր և այլն»,-ասաց Արամ Անանյանը:
Արդեն իրականացվում է տեղեկատվության փոխանակում երկու երկրներում կայանալիք կարևոր միջոցառումների վերաբերյալ: Արամ Անանյանը նշեց, որ ոչ մեծ գործակալությունների համար դա կարևոր է, քանի որ հնարավոր չէ ամեն երկրում ներկայություն ապահովել, հետևաբար նման համագործակցության շնորհիվ հնարավորությունը մեծանում է: Նրա խոսքով, պայմանավորվածություն է ձեռք բերվել ակտիվացնել մասնավորապես տնտեսական, տուրիստական ոլորտում լուսաբանման գործընթացը, մշակութային միջոցառումների անդրադարձը, որպեսզի երկու երկրների հասարակությունները միմյանց ավելի լավ ճանաչեն:
«Փորձելու ենք լրագրողական կամուրջ կառուցել: Մենք որպես իրական բարեկամներ կարողանում ենք բաց ու անկեղծ երկխոսություն ունենալ շատ հարցերի շուրջ»,-հավելեց Արամ Անանյանը:
GHN լրատվական գործակալության ղեկավար, գլխավոր խմբագիր Թեյմուրազ Չումբուրիձեն, կարևորելով տարբեր երկրների լրատվական գործակալությունների հետ համագործակցությունը, նշեց, որ այն ի հայտ է բերում նոր մոտեցումներ:
««Արմենպրես» լրատվական գործակալության հետ համագործակցության մեծ ներուժ կա: Տարբեր ոլորտներում կարող ենք համատեղ աշխատել, արագ իրականացնել տեղեկատվության փոխանակում, ծանոթանալ միմյանց փորձին` դրանով իսկ զարգացնելով, բարելավելով մեր աշխատանքը»,-ասաց Թեյմուրազ Չումբուրիձեն:
Նրա խոսքով, արդի ժամանակաշրջանում մեծ դեր ունեն պրոֆեսիոնալ մոտեցումներով առաջ շարժվող լրատվական գործակալությունները: Հավատարիմ լինելով պրոֆեսինալիզմին` այդ լրատվական գործակալությունները կարող են լավ օրինակ լինել մեդիա դաշտում:
«Այսօր մրցակցությունը շատ մեծ է: Բազմաթիվ լրատվամիջոցներ կարող են իրենց թույլ տալ բակային մակարդակով խոսակցությունը որպես տեղեկատվություն հրապարակել կամ հրամցնել այնպիսի հոդվածներ, որոնց վերնագրերը տարբերվում են բուն նյութերից, ինչը չես տեսնի պրոֆեսիոնալ գործակալություններում: Վերջիններս կարող են լավ օրինակ լինել այդ հարցում»,-հավելեց Թեյմուազ Չումբուրիձեն: