ԱՄՆ հայ համայնքը Սպիտակ տանը կոչ է անում ավելի հավասարակշռված մոտեցում որդեգրել ԼՂ հակամարտության հարցում
2 րոպեի ընթերցում
ԵՐԵՎԱՆ, 12 ՕԳՈՍՏՈՍԻ, ԱՐՄԵՆՊՐԵՍ: ԱՄՆ Հայ դատի հանձնախումբը Սպիտակ տանը կոչ է անում ավելի հավասարակշռված և կայուն մոտեցում ցուցաբերել Լեռնային Ղարաբաղում վերջնական խաղաղություն ապահովելու հարցում: Ինչպես հաղորդում է «Արմենպրես»-ը, վկայակոչելով ԱՄՆ Հայ դատի հանձնախմբի կայքը, հանձնախումբն ընդլայնում է ԱՄՆ հայկական համայնքի ջանքերն ընդդեմ «մադրիդյան սկզբունքների» և կոչ է անում Սպիտակ Տանն ավելի հավասարակշռված մոտեցում ցուցաբերել Լեռնային Ղարաբաղի հակամարտության կարգավորման և վերջնական խաղաղություն ապահովելու հարցում:
ԱՄՆ հայ համայնքի ներկայացուցիչները նամակ են հղել ԱՄՆ նախագահ Բարաք Օբամային և փոխնախագահ Ջո Բայդենին, որով կոչ են անում ընդդիմանալ ԼՂ հակամարտության կարգավորման վերաբերյալ ցանկացած բանաձևի, որը դեմ է լինելու ամերիկյան համոզմունքներին և ինքնորոշման իրավունքին:
«Կոչ ենք անում ընդդիմանալ ցանկացած բանաձևի, որը կստիպի քրիստոնյա ազգաբնակչությանն ապրել Ադրբեջանի բռնատիրական վարչակարգի տիրապետության տակ: Այսօր Արցախը, չնայած Ադրբեջանի՝ տասնամյակներ տևած ագրեսիային, շարունակում է նվիրված մնալ ժողովրդավարության ամրապնդման սկզբունքին, զարգացնում է տնտեսությունը և համագործակցում է տարածաշրջանային ուժերի, ԵԱՀԿ-ի հետ՝ տարածաշրջանում հարատև խաղաղության հասնելու համար: Առաջին անգամ 2007թ. բանակցված «մադրիդյան սկզբունքները», որոնք մինչև վերջերս գաղտնի էին պահվում, առաջարկում է Ադրբեջանի տիրապետության տակ վերադարձնել 7 շրջաններ Արցախին կարգավիճակ տալու մի անորոշ խոստման դիմաց, ինչն ավելի է նպաստելու տարածաշրջանային անկայունությանն ու հակամարտության շարունակականությանը: Իր բնույթով Արցախը շատ նման է ամերիկյան պատմության, որը ներկայացնում է ազատ ժողովրդի հաղթանակն ընդդեմ օտարերկրյա տիրապետության: Ժողովրդավարական, քրիստոնեական մեծամասնությունը, որը հանդես է գալիս ընդդեմ անհանդուրժողականության, արժանի է ստանալ մեր աջակցությունը»,- ասված է ԱՄՆ նախագահին և փոխնախագահին ուղղված նամակում: