1 րոպեի ընթերցում
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Ադրբեջանի գործողություններում եղեռնածին վտանգներ կան: Ինչպես հաղորդում է «Արմենպրես»-ը, այս մասին Ծիծեռնակաբերդի հուշահամալիրում 1915 թվականի Հայոց ցեղասպանության անմեղ զոհերի հիշատակը հարգելուց հետո լրագրողների հետ հանդիպմանը նշեց «Ժառանգություն» կուսակցության առաջնորդ Րաֆֆի Հովհաննիսյանը:
«Դատապարտելով 1915 թվականի կատարվածը, հատուցում պահանջելով Հայոց ցեղասպանության և հայրենազրկման համար, անհրաժեշտ է հասկանալ, որ այսօր, առավել քան երբևէ, պետք է լինի մեր համախմբումը մեր պետականության, բանակի, մեր զինվորի շուրջը: Զինվոր, ով իր կյանքով պաշտպանում է մեր հայրենիքը չարանենգ, նախահարձակ թշնամու գործողություններից: Անհրաժեշտ է, որ այսօր հասկանանք մի բան. մենք պետք է միասնական լինենք, և խնդրի կարգավորման համար արտահերթ լուծումներ պահանջենք: Դրանից բացի, մեր տունը ներքուստ պետք է կարգի բերենք, դա է մեր հանրային պահանջը»,-ասաց Րաֆֆի Հովհաննիսյանը: