Ըստ վրացագետի` ռազմական համագործակցության ոլորտում Հայաստանն ու Վրաստանն ունեն չիրացված ռեսուրս
2 րոպեի ընթերցում
ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Ռազմական համագործակցության ոլորտում Հայաստանն ու Վրաստանն ունեն չիրացված ռեսուրս: Այս մասին «Արմենպրես»-ի մամուլի սրահում հրավիրված ասուլիսին նշեց վրացագետ Ալիկ Էրոյանցը: Նրա խոսքով, ռեսուրսի չօգտագործումը պայմանավորված է այն հանգամանքով, որ Հայաստանը ՀԱՊԿ անդամ երկիր է, իսկ Վրաստանը ձգտում է դառնալ ՆԱՏՕ-ի անդամ:
«Այս ոլորտում Վրաստանն ավելի զգուշավոր քաղաքականություն է վարում, կարծես, ավելի երկար է մտածում որոշումների կայացման ժամանակ: Այսօր ռազմական ոլորտում Վրաստանի հետ համագործակցությունը դիտարկում ենք այնպիսի ուղղություններով, ինչպիսիք են ուսումնավարժական, պլանային համագործակցության հարցերը: Ավելի հեռուն ներկա շրջափուլում դժվար է դիտարկել»,-ասաց վրացագետը:
Անդրադառնալով Վրաստանի Պաշտպանության նախարարի` Հայաստան կատարած այցին` վրացագետը նշեց, որ Վրաստանի հարաբերությունները Թուրքիայի և Ադրբեջանի հետ որոշակի նահանջ են ապրել նախորդ տարիների համեմատ: Այդ երկրների միջև շփումները, ինչպես բարձր մակարդակում, այնպես էլ հասարակական, քաղաքական հարթության մեջ, բավական պասիվացել են: Ի հակառակ դրան, ավելի են ակտիվացել հայ-վրացական շփումները:
«Եթե հետևենք ադրբեջանական, թուրքական լրատվամիջոցներին, ապա կտեսնենք, որ լրագրողերի, փորձագետների մակարդակով այդ խնդիրը բարձրացվում է, կա վրդովմունք` ուղղված Վրաստանին: Վրաստանի Պաշտպանության նախարարն էլ Հայաստան կատարած այցելության ընթացքում հայտարարություն արեց այն մասին, որ Ադրեբջանն իրենց ռազմավարական դաշնակիցն է, իսկ Թուրքիան հարևանը: Սա մեսիջ էր Ադրեբջանին ու Թուքիային` ցույց տալով, որ իրենց հարաբերություններում ամեն ինչ կարգին է»,-ավելացրեց վրացագետը:
Պաշտոնական այցով Հայաստան էր ժամանել Վրաստանի պաշտպանության նախարար Թինաթին Խիդաշելիի գլխավորած պատվիրակությունը: Ամիսներ առաջ էլ Վրաստանում էր ՀՀ ԶՈւ ԳՇ պետ գեներալ-գնդապետ Յուրի Խաչատուրովը և ՀՀ պաշտպանության նախարարի առաջին տեղակալ Դավիթ Տոնոյանը։