3 րոպեի ընթերցում
ԵՐԵՎԱՆ, 17 ՆՈՅԵՄԲԵՐԻ, ԱՐՄԵՆՊՐԵՍ: Հաջորդ տարի պաշտպանական քաղաքականության առաջնահերթ ուղղություններից շարունակելու է մնալ հայրենական ռազմարդյունաբերական համալիրի զարգացումը: Այս մասին Ազգային ժողովում ՀՀ 2016 թ. պետական բյուջեի նախագծի քննարկմանն ասաց հարակից զեկուցող, ՀՀ Ազգային ժողովի պաշտպանության, ազգային անվտանգության և ներքին հարցերի մշտական հանձնաժողովի նախագահ Կորյուն Նահապետյանը: «2016 թ. համար նախատեսված են հատուկ գիտահետազոտական և փորձակոնստրուկտորական աշխատանքներ, որոնք ուղղված են պաշտպանական համակարգում ժամանակակից և բարձր տեխնոլոգիաների ներդրմանը և կիրառմանը: Սահմանված միջոցառումների իրականացման արդյունքում ռազմարդյունաբերական համակարգում կունենանք որոշակի ձեռքբերումներ: Ցանկանում եմ նշել, որ հաջորդ տարի շարունակվելու են «Ռազմարդյունաբերական համալիրի մասին» Հայաստանի Հանրապետության օրենքի կիրարկումն ապահովելու աշխատանքները ռազմարդյունաբերական համալիրի սուբյեկտների գործունեության մասով»,- «Արմենպրես»-ի հաղորդմամբ՝ ընդգծեց Նահապետյանը:
Ռազմատեխնիկական ոլորտում քաղաքականությունը շարունակվելու է իրականացվել դաշնակից երկրների հետ սերտ համագործակցության միջոցով: «Խոսքը վերաբերում է պաշտպանողական և հարձակվողական սպառազինություններին, հեռահար և ճշգրիտ խոցման միջոցների ձեռքբերման, ռազմատեխնիկական բնագավառում համատեղ ձեռնարկությունների, հակաօդային պաշտպանության միասնական համակարգի ստեղծման, սպառազինությունների և ռազմական տեխնիկայի նորոգման և արդիականացման և այլ ոլորտներում համագործակցության խորացման մասին»,- մանրամասնեց Նահապետյանը:
Պատգամավորը կարևորում է նաև զինված ուժերի համար ճիշտ կադրերի պատրաստումը, որակավորման բարձրացումը ինչպես ներպետական, այնպես էլ արտերկրյա ռազմական ուսումնական հաստատություններում:
Առաջիկա տարվա, ինչպես նաև միջնաժամկետ և երկարաժամկետ ժամանակահատվածում պաշտպանական համակարգի ուշադրության կենտրոնում է զինված ուժերի համալրումը ինչպես պայմանագրային զինծառայողների թվաքանակի ավելացման, զորակոչի կազմակերպման գործում հստակ բարեփոխումների իրականացման, այնպես էլ զինված ուժերի օպտիմալացման և կառուցվածքային փոփոխությունների միջոցով: «Դրան զուգահեռ մենք կարևորում ենք առողջապահական և պարենային որակի բարելավումը որպես զինվորական ծառայության ոլորտում հիմնարար միջոցառում»,- հավելեց Կորյուն Նահապետյանը:
Նա հստակեցրեց, որ շարունակելու են ուշադրության կենտրոնում պահել զինծառայողների և նրանց ընտանիքների, զոհված և հաշմանդամ զինծառայողների ընտանիքների սոցիալական ապահովման խնդիրները: Այս առումով խնդրո առարկա են զինծառայողների աշխատավարձերի և կենսաթոշակների բարձրացումը, բնակարանով ապահովումը, միանվագ դրամային օգնությունը և այլն: