Աշխարհի առաջնությանը մեկնում ենք մեր 5 վարկանիշի հետևից. Փաշիկ Ալավերդյան
1 րոպեի ընթերցում
![Աշխարհի առաջնությանը մեկնում ենք մեր 5 վարկանիշի հետևից. Փաշիկ Ալավերդյան](http://armenpress.am/resized/480/static/news/b/2015/10/823220.jpg)
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Ծանրամարտի Հայաստանի տղամարդկանց հավաքականը Ծաղկաձորի մարզաբազայում նախապատրաստվում է աշխարհի վարկանիշային առաջնությանը: Հավաքականի գլխավոր մարզիչ Փաշիկ Ալավերդյանի խոսքով՝ թիմի տղաները լավ մարզավիճակում են: «Մենք աշխարհի առաջնությանն ենք մեկնում մեր 5 վարկանիշի հետևից: Գիտենք, որ անցած տարվա 5 վարկանիշ դեռ չի նշանակում, որ ունենք այդ վարկանիշները: Մենք պետք է կարողանանք առաջին հերթին հաստատել այդ տեղերը: Միանշանակ, լավ մարզավիճակում են. տղաներն այնպիսի մարզավիճակում են, ինչպիսին չեն եղել մինչ օրս»,-«Արմենպրես»-ի հաղորդմամբ, ՀԱՕԿ լրատվականի լրագրողի հետ զրույցում ասել է Ալավերդյանը:
Ծանրամարտի Հայաստանի տղամարդկանց հավաքականն աշխարհի առաջնությանը կմասնակցի հետևյալ կազմով՝ Վանիկ Ավետիսյան (69 կգ), Տիգրան Մարտիրոսյան, Անդրանիկ Կարապետյան (77 կգ), Սիմոն Մարտիրոսյան (105 կգ), Ռուբեն Ալեքսանյան, Գոռ Մինասյան (+105 կգ): Հոկտեմբերի 29-ին հավաքականը կմեկնի Կազան՝ հերթական ուսումնամարզական հավաքի: Իսկ արդեն նոյեմբերի 16-ին թիմը կմեկնի Հյուսթոն: Աշխարհի առաջնությունը մեկնարկում է նոյեմբերի 20-ին և կեզրափակվի նոյեմբերի 28-ին:
Լուսանկարը` Հայաստանի Ազգային Օլիմպիական Կոմիտեի կայքից