Իրաքյան ուժերը տարածք են ազատագրել Անբարի նահանգում
2 րոպեի ընթերցում
![Իրաքյան ուժերը տարածք են ազատագրել Անբարի նահանգում](http://armenpress.am/resized/480/static/news/b/2015/10/822092.jpg)
ԵՐԵՎԱՆ, 14 ՀՈԿՏԵՄԲԵՐԻ, ԱՐՄԵՆՊՐԵՍ: Իրաքյան ուժերը հոկտեմբերի 14-ին ազատագրել են Անբարի նահանգի Ռամադի քաղաքի հյուսիում գտնվող Իթթիսամ հրապարակը: Ինչպես հաղորդում է«Արմենպրես»-ը` վկայակոչելով արաբական լրատվամիջոցները, ազատագրելուց հետո Իրաքի դրոշը բարձրացվել է Ալբու Ֆիրաժ կամրջի վրա: ԻՊ-ի ահաբեկիչները կենդանի ուժի մեծ կորուստներ են կրել, նաև ոչնչացվել է մեծ քանակությամբ զենք ու տեխնիկա: Տեղեկություններ կան, որ շատ ահաբեկիչներ փախուստի են դիմել Ալբու Ֆիրաժ շրջանից, իսկ անվտանգության ուժերը շարունակում են տարածքի ազատագրման գործողությունները:
Միևնույն ժամանակ իրաքյան օդային ուժերը Սալահ ադ Դին նահանգի Թիքրիթ քաղաքի հյուսիսում ռազմական գործողություններ իրականացնելիս «Իսլամական պետության» երկու ղեկավարների են սպանել: Օդային հարվածների թիրախում է հայտնվել ԻՊ-ի ղեկավարների նստավայրը, որտեղ այդ ժամանակ նիստ էր ընթանում: Բացի երկու, ղեկավարներից, ևս 24 ահաբեկիչներ են սպանվել:
Ավելի վաղ օդային հարվածների հետևանքով Անբարի նահանգի Ֆալլուջա քաղաքում տասնյակ ահաբեկիչներ են սպանվել:
«Իսլամական պետություն» ահաբեկչական կազմակերպությունը գործում է Սիրիայի և Իրաքի տարածքներում: 2013թ. ապրիլին «Ալ Կաիդա»-ի երկու ճյուղերի միավորման արդյունքում ձևավորվել է խմբավորում՝ «Իրաքի և Լևանտի իսլամական պետություն» անվանումով, որի նպատակն էր կազմավորել իսլամական էմիրություն Լիբանանի, Սիրիայի և Իրաքի տարածքներում: 2014թ. հունիսի 29-ին ԻԼԻՊ-ը Սիրիայի և Իրաքի գրաված տարածքներում հայտարարել է Իսլամական խալիֆաթ հիմնելու մասին, որի խալիֆ է նշանակվել Աբու Բաքր ալ Բաղդադին: Այնուհետև կազմակերպության անվանումը փոխելու որոշում է ընդունվել, և այն վերանվանվել է «Իսլամական պետություն»: Խմբավորման կազմում կռվում են 80 երկրի զինյալներ: