ՌԴ օդային ուժերը 88 հարված են հասցրել ահաբեկիչների դիրքերին
1 րոպեի ընթերցում
![ՌԴ օդային ուժերը 88 հարված են հասցրել ահաբեկիչների դիրքերին](http://armenpress.am/resized/480/static/news/b/2015/10/821992.jpg)
ԵՐԵՎԱՆ, 13 ՀՈԿՏԵՄԲԵՐԻ, ԱՐՄԵՆՊՐԵՍ: Ռուսական օդային ուժերը 88 հարված են իրականացրել Սիրիայում: Ինչպես հաղորդում է«Արմենպրես»-ը, վկայակոչելով արաբական լրատվամիջոցները, այս մասին հոկտեմբերի 13-ին տեղեկացրել է Սիրիայի պաշտպանության նախարարությունը` նշելով, որ վերջին 24 ժամվա ընթացքում «Իսլամական պետության» 86 նպատակակետեր են հայտնվել ռուսական օդուժի թիրախում: Ռուսական օդուժը ռմբակոծել է ԻՊ-ի դիրքերը, մասնավորապես, Ռակկայի, Համայի, Իդլիբի, Լաթաքիայի և Հալեպի նահանգներում:
Նախօրեին Ռուսաստանի պաշտպանության նախարարությունը տեղեկացրել էր, որ 24 ժամվա ընթացքում ռուսական օդային ուժերը 64 օդային հարվածներ էին հասցրել Համայի, Լաթաքիայի, Իդլիբի, Ռակկայի նահանգներում ահաբեկչական խմբավորումների դիրքերին` մեծ վնասներ հասցնելով ահաբեկիչներին:
Ռուսաստանը Սիրիայի Նախագահ Բաշար ալ Ասադի խնդրանքով` սեպտեմբերի 30-ին սկսել է հարվածել «Իսլամական պետություն» ահաբեկչական կազմակերպության դիրքերին: Ահաբեկիչների դեմ ռազմական գործողություններում ներառվել են ավելի քան 50 օդանավեր ու ուղղաթիռներ: Բացի այդ, ահաբեկիչների դիրքերը հրթիռակոծվել են ծովից: