Սիրիայի հարցի առնչությամբ ՌԴ-ի եւ ԱՄՆ-ի միջեւ լարվածությունն ավելի կսրվի
1 րոպեի ընթերցում
![Սիրիայի հարցի առնչությամբ ՌԴ-ի եւ ԱՄՆ-ի միջեւ լարվածությունն ավելի կսրվի](http://armenpress.am/resized/480/static/news/b/2015/10/821986.jpg)
ԵՐԵՎԱՆ, 13 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիա մտնելուց առաջ Ռուսաստանը չէր ակնկալում ստանալ Արեւմուտքի աջակցությունը, սակայն խորհրդակցություններ է ունեցել Իսրայելի հետ եւ գաղտնի պայմանավորվածություններ ձեռք բերել: «Արմենպրես»-ի հարցին ի պատասխան, քաղաքագետ Հայկ Մարտիրոսյանը շեշտում է, որ Սիրիայի պատճառով Ռուսաստանի եւ Արեւմուտքի միջեւ լարվածությունն էլ ավելի կմեծանա: «ԱՄՆ-ն ցանկանում է, որպեսզի Ասադի վարչակարգը տապալվի, մինչդեռ Ռուսաստանը ցանկանում է, որպեսզի Ասադը շարունակի պաշտոնավարել»,- ասաց Մարտիրոսյանը` հավելելով, որ այդքան էլ էական չէ, թե ՄԱԿ-ի գագաթնաժողովի ժամանակ Արեւմուտքն Ասադի պաշտոնավարման առնչությամբ ինչ է հայտարարել:
Ըստ Մարտիրոսյանի, Սիրիայի հարցի առնչությամբ անընդհատ մեծանում է նաեւ քննադատությունը ԱՄՆ-ում, եւ Կոնգրեսում Հանրապետական կուսակցությունը քննադատում է Օբամային` Սիրիայի ճգնաժամի առնչությամբ առավել կտրուկ դիրքորոշում չցուցաբերելու համար: «ԱՄՆ կոնգրեսում Հանրապետական լոբբին ազդեցիկ է, դրա հետ մեկտեղ նաև մամուլը բավական մեծ ճնշում է գործադրում Նախագահ Օբամայի վարչակազմի վրա, որպեսզի առավել մեծ հակադրություն ցուցաբերվի ռուսական գործողություններին»,- ընդգծեց Մարտիրոսյանը: